Б.ОД

Барилгын кран авто зам болон явган хүний зам дээр унах осол сүүлийн үед их  гарах болсон. Энэ он гарсаар хамгийн сүүлд Хан-Уул дүүрэгт барилгын кран унаж хоёр хүн даруулж амиа алдсан харамсалтай хэрэг өчигдөр гарлаа.

Энэ талаар МХЕГ-аас тодруулахад "Хөдөлмөрийн болон өргөх байгууламжийн байцаагч нар осол дээр ажиллаж байгаа. Хүний амь нас эрсэдсэн  учраас ЦЕГ-т эрүүгийн хэрэг үүсгэн шалгаж байна. Улсын хэмжээнд нийт 17 мянган өргөх байгууламж байдаг. Гэхдээ энэ нь зөвхөн кран биш. Үүнд барилгын гаднах дүүжин өргүүр, лифт, урсдаг шат гээд ачаа болон хүнийг дээшээ, доошоо чиглэлд зөөх бүх байгууламж багтдаг. МХЕГ-т хоёр, нийслэлд нэг байцаагч эдгээр өргөх байгууламжийг хариуцан ажиллаж байна. Аймгуудад тус чиглэлийн орон тоо давхардсан байдлаар бий. Тухайлбал барилгын техникийг хариуцдаг хүн давхар өргөх байгууламж хариуцдаг. Өргөх байгууламжийг хариуцдаг байцаагчийн орон тоог нэмэгдүүлэх гэхээсээ илүү аж ахуйн нэгжүүд өөрсдөө маш их хариуцлагатай ажиллах хэрэгтэй болж байна. Өргөх байгууламжийн зөрчил гарсан тохиолдолд албан шаардлага хүргүүлдэг. Улмаар зөрчлөө арилгахгүй бол торгох, цаашлаад үйл ажиллагааг нь прокурорын зөвшөөрлөөр түр зогсооно. Түүнчлэн үйлчилгээ эрхэлж байгаа зөвшөөрлийг нь цуцлах саналыг өгсөн газарт нь хүргүүлэх арга хэмжээг манай байгууллага хэрэгжүүлдэг" гэв.