С.УЯНГА

Бүгд Найрамдах Польш улсын Гадаад хэргийн сайд Звигнев Рау энэ сарын 04-06-ны өдрүүдэд Монгол Улсад айлчилж байна. Тэрбээр үндэсний өдөр тутмын “Зууны мэдээ” сонинд дэлгэрэнгүй ярилцлага өгсөн юм. Сайд Звигнев Рау “Манай хоёр орны харилцаа, хамтын ажиллагаа улам бүр идэвхжиж буйд сэтгэл нэн таатай байна. Ялангуяа худалдааны нийт бараа эргэлтийн түвшин өссөөр байгаа юм. Бид COVID-19 цар тахал хумигдаж буй энэ үед улс төрийн яриа хэлэлцээгээ сэргээж эхэлж байна. Үүний нэг тод жишээ бол Монгол Улсад хийж буй айлчлал маань юм. Түүнчлэн бид  Польш Улсын Ерөнхийлөгчийн Монгол Улсад хийх албан ёсны айлчлалд бэлтгэж байгаа бөгөөд айлчлал энэ онд хэрэгжих болов уу хэмээн найдаж байна.

Польш улс эдийн засгийн хамтын ажиллагааг ихэд чухалчилж үздэг. Тэр дундаа хоёр талын тэргүүлэх чиглэл болох зэсийн хайгуул, олборлолт, эрчим хүчний эх үүсвэрийг нэмэгдүүлэх болон байгаль орчныг хамгаалах зэрэг салбар хоорондын хамтын ажиллагааг өргөжүүлэн хөгжүүлэхэд бид хүчин чармайлт гарган ажиллах болно. Манай зарим хүнсний бүтээгдэхүүний хэрэглээ Монголд нэлээд өндөр, нийтэд танигдсан гэдгийг Польшийн үйлдвэрлэгчид мэддэг, онцгойлон анхаардаг болохыг тэмдэглэмээр байна. Бид энэ нөөц бололцоог цаашид улам нэмэгдүүлэхийн төлөө ажиллаж байгаа.

Манай хоёр орны хооронд дипломат харилцаа тогтоосны 70 жилийн ойг 2020 онд тэмдэглэн өнгөрүүлсэн билээ. Улаанбаатар хотноо БНПУ-ын Элчин сайдын яамыг дахин сэргээн нээх шийдвэр гарсан нь ойн арга хэмжээний нэгэн чухал үйл явдлын нэг байлаа. Энэхүү шийдвэр нь Польш улс Монгол Улстай харилцаа хамтын ажиллагааг улам бүр бэхжүүлэхэд онцгой анхаарал хандуулдгийн нэг илрэл юм. Манай улс дипломат төлөөлөгчийн газраа дахин сэргээн нээсний үр дүнд хоёр орны улс төр, эдийн засгийн харилцаа хамтын ажиллагаа улам өргөжин хөгжинө гэдэгт итгэл төгс байна” хэмээн ярилаа.

Эх сурвалж: www.polit.mn