Б.ДАРЬСҮРЭН

Үндэсний статистикийн хорооны 2021 оны мэдээллээр Монгол Улс 305 мянга орчим малчинтай байна. Үүнээс 238 мянга нь НДШ-д хамрагдах боломжтой байгаа аж. Өнгөрсөн оны эцэст 49.4 мянган малчин буюу 20.4 хувь нь сайн дурын даатгалд хамрагджээ.

НҮБ-ын санхүүжилтээр хэрэгжүүлж буй төслийн хүрээнд Хөдөлмөр, нийгмийн хамгааллын яам, Олон улсын хөдөлмөрийн байгууллага, Хараат бус судалгааны хүрээлэн хамтран “Малчдын эрүүл мэнд, нийгмийн даатгалын талаарх зан үйл” судалгааг 2020-2022 онд зохион байгуулсан байна.

Найман аймгийн 4000 малчныг хамруулсан. Тэдний дийлэнх нь 35-44 насныхан иргэд байв. Судалгаанд хамрагдагсдын 39 хувь нь НДШ төлж байгаа бол 29 хувь нь сайн дураар, есөн хувь нь албан журмаар хамрагджээ. Малчдын 81 хувь нь тэтгэвэр авах хүсэлтэй байдаг ч НДШ төлж байгаа нь бага гэж дүгнэсэн аж.

Малчдад нийгмийн даатгалын талаар анхан шатны ойлголт байдаггүйгээс шимтгэлээ тогтмол төлөхгүй, дундаас нь орхих, даатгалын тэтгэмжээ авах эрхтэй байсан ч нэхэмжлэхгүй байгааг судлаачид онцолжээ. Энэ хандлага нь малчдын нийгмийн даатгалын талаарх хандлагад сөргөөр нөлөөлж буйг судалгааны тайланд дурдсан байна.

Эх сурвалж: www.polit.mn