Ч.ГАНТУЛГА

Энэ удаагийн “Сонгодог урлаг” буландаа Монголын сонгодог урлагийн ертөнцөд өөрсдийн өнгө төрхийг  тодорхойлж, шинээр гарч буй гоцлол бүжигчдийн тухай мэдээлэл хүргэхээр бэлтгэлээ.

Ирээдүйн хун

Сонгодог урлаг тэр дундаа балетын урлаг бол залуу насны мэргэжил. Цэл залуу насны гоо үзэсгэлэн, эрч хүч, хүсэл мөрөөдлөөр тайзан дээр хоромхон хугацаанд асаад өнгөрнө гэж бодоход харуусмаар ч юм шиг. Харин тэдний залгамж халаа болж, энэ цагт алдарт “Хунт нуур”-аар өөрийгөө тунхаглаж яваа театрын шинэхэн гоцлооч бол М.Нандинцэцэг юм. Анх таван наснаасаа балетаар хичээллэж эхэлсэн тэрбээр 2017 онд Хөгжим бүжгийн консерваторийг төгсчээ. М.Нанинцэцэгийн хувьд сургуулиа төгсөхөөсөө өмнө УДБЭТ-ын тайзнаа “Цөмөөхэй” бүжгэн жүжгээр гарсан юм. Энэ үеэс л театрын урлагт дурлаж, энэ л ягаан байшинд ажиллах хүсэл нь улам оргилсон тухайгаа ярьжээ. Харин 2018 оноос мөрөөдлөө биелүүлж, театрт ажиллах эрхээ атгасан билээ. Анхны гоцолсон бүтээл нь “Дэггүй Лиз” бүжгэн жүжиг байв. Үүнээс хойш тэрбээр ур чадварын хувьд гэрлийн хурдаар өсөж яваа, театрын шинэхэн гоцлооч юм. М.Нандинцэцэг 2019 онд алдарт “Хунт нуур” балетад гоцлосон юм. Дөнгөж хоёрхон жил ажиллаад ийнхүү энэ бүтээлд гарсан нь түүний хэр чансаатай уран бүтээлч гэдгийг нотлох бизээ. М.Нандинцэцэг “Хунт нуур” балетын тухай “Өөрийгөө Хунт нуурт гоцолно гэж төсөөлж байгаагүй. Бэлтгэлийн дундуур л хасагдах байх даа гэж бодож байсан ч бүх чадлаа шавхан  бүжиглэж балетаа амжилттай дуусгасан. Үе үеийн хунгууд, бүжигчид  “Хунт нуур” бүжигчнээс сэтгэл зүйгээ хүчтэй байлгахыг шаарддаг гэж надад үргэлж хэлдэг” гэж сэтгэгдлээ хуваалцаж байв. 

Орос школ

Харин дараагийн онцлох гоцлооч бол УДБЭТ-ын залуу бүжигчин О.Мөнхжин билээ. Түүний хувьд дэлхийн шилдэг бүжигчдийн өлгий ОХУ-д мэргэжил эзэмшжээ.  О.Мөнхжин ОХУ-ын Ерөнхийлөгч В.Путины тэтгэлгээр Пермь хотын Бүжгийн урлагийн сургуульд суралцсан азтай нэгэн. Энэхүү тэтгэлэгийг  тухайн үед 12 хүүхдэд өгч байсан юм. Анх гимнастикаар хичээллэж байсан тэрбээр ээжийнхээ шахалтаар бүжгийн сургуульд шалгалт өгтөл тэнцчихэж. Балетчин болно гэж төсөөлөөгүй байсан хүүд энэ урлаг их л хол юм шиг санагдаж байжээ. Гэвч сурах бүртээ улам дурлаж, оюутан байхдаа бүжгийн урлагийн үр шим, гайхамшгийг мэдэрч, ирээдүйд алдартай гоцлооч болно гэж сэтгэл нь шулуудсан ажээ. Үүнээс гадна О.Мөнхжингийн хувьд 2017 онд Бээжинд болсон Олон улсын “IBCC” тэмцээнээс хосын төрөлд тусгай байр, 2019 онд ОХУ-д болсон Орос, Япон, Евро Азийн балетын урлагийн тэмцээнээс мөнгөн медаль хүртэж байжээ. Тэрбээр мөн л энэ цагийн шинэхэн ханхүүгээр тодроод байгаа юм. О.Мөнхжин “Хунт нуур” балетын тухай “Өмнө нь Хунт нуур бүжгэн жүжиг тоглогдоход ханхүүгийн дүрийг бүтээхийг  үнэхээр хүсдэг байлаа. Уг бүжгэн жүжиг театрын маань тайзнаа сар бүр тоглогддог ч миний хувьд туслах дүр бүтээснээр эхний мөрөө гаргасан юм. Найруулагч маань боломж олгож гол дүр хуваарилсан болохоор тултал бүтээхийг л зорьж ажиллаж байна.” хэмээн сэтгэгдлээ хуваалцаж байв.

Эх сурвалж: “Зууны мэдээ” сонин