С.САРУУЛ
“Хүүхдэд ээлтэй Монгол” хүүхдийн өмнө үүрэг хүлээгчдийн үндэсний чуулган өнөөдөр болж байна. Энэ үеэр Хууль зүй, дотоод хэргийн дэд сайд Б.Солонго “Өнөөдөр улсын хэмжээнд хүүхдийн эрх хамгааллын чиглэлээр 52 хууль батлагдан хэрэгжиж байгаа бол олон улсын 22 гэрээ, конвенцод Монгол Улс нэгдсэн байна. Мөн хүүхдийн эрх, хүүхэд хамгааллын чиглэлээр нийт 12 тогтоол, яам агентлагуудын баталсан 110 журам хэрэгжиж байна.
Манай салбарын зүгээс авч хэрэгжүүлэх томоохон таван асуудлыг дурдъя. Тухайлбал, Гэр бүлийн тухай хуулийг шинэчлэх ажлыг Хөдөлмөр, нийгмийн хамгааллын яамнаас хамтран зохион байгуулж байна. Гэр бүлийн тухай хуулийг шинэчлэн найруулгыг боловсруулах ажлын хэсгийн ахлагчаар би өөрөө ажиллаж байгаа. Ингэхдээ энэ хуульд гэр бүлийн орчин дахь хүүхэд хамгааллын асуудлыг нарийвчилж тусгахаар төлөвлөж байна. Гэрлэлт дуусгавар болох харилцаанд хүүхдийн хууль ёсны эрх ашгийг хангах, хамгаалах зорилгоор хүүхдээс тусдаа амьдарч байгаа эцэг, эхийн үүргийг тусгаж өгөхөөр төлөвлөж байна. Түүнчлэн одоогийн хуульд хүүхдийн тэтгэмжийн хэмжээг их бага байхаар зохицуулсан, тэтгэмж төлөх шүүхийн шийдвэрийн хэрэгжилт удаашралттай байх асуудал бий. Үүнтэй холбоотойгоор Гэр бүлийн тухай хуульд хүүхдийн тэтгэмж олгогч этгээдийн орлоготой уялдуулж, илүү өндөр хэмжээгээр тогтоохоор ажиллаж байна. Мөн тэтгэмж олгох талаар шүүхийн шийдвэр гарсан бол хэрэгжилтийг нь хангадаг байхаар Иргэний болон захиргааны шүүхийн шийдвэр гүйцэтгэлийн бие даасан хуулийг боловсруулаад ажиллаж байгаа. Гэр бүлийн маргааныг Иргэний хэргийг хянан шийдвэрлэх тухай хуулиар зохицуулдаг. Шүүхийн ачаалал их тул хэрэг хянан шийдвэрлэх ажиллагаа маш удаашралттай байдагтай холбоотойгоор гэр бүлийн маргааныг хянан шийдвэрлэхэд илүү мэргэшсэн, бие даасан статустай дагнасан шүүх байх шаардлагатай эсэх асуудлыг судалж байна” гэлээ.
Эх сурвалж: www.polit.mn