Б.ДОЛЖИНЖАВ

“Хойд Солонгостой зөрчилддөг цаг үе дуусч, Өмнөд болон Хойд Солонгосын хооронд шинэ гэрээ хэлэлцээрийг эхлүүлэх ёстой” гэж БНСУ-ын шинэ ерөнхийлөгч Юн Сук Ёл даваа гарагт мэдэгджээ. Тэрбээр үүрэгт ажлаа хүлээн авснаас хоёр долоо хоногийн дараа “CNN”-д ярилцлага өгөхдөө ингэж ярьжээ. Түүний ерөнхийлөгч болсноос хойших анх удаагаа хэвлэлд яриа өгч байгаа тохиолдол нь энэ юм. 
Тэрбээр ярилцлагын үеэр “Тоглолтын бөмбөг Хойд Солонгосын удирдагч Ким Жон Уны талбайд бий. Бидэнтэй шинэ харилцааг эхлүүлэх эсэх нь түүний сонголт. Би хоёр Солонгос хамтдаа хөгжиж дэвшээсэй хэмээн хүсч байна. Гэхдээ Хойд Солонгос цөмийн чадавхиа нэмэгдүүлэх нь олон улсын энх тайван байдлыг хадгалахад тусална гэдэгт би итгэхгүй байна. Хойд  Солонгосын өдөөн хатгалга, зөрчлөөс түр хугацаанд зугтах нь бидний хийх ёстой зүйл биш.  Өнгөрсөн таван жилийн хугацаанд хийсэн үйлдэл үүнийг алдаа байсныг баталлаа” хэмээн ярьжээ. 
Он гарснаас хойш Хойд Солонгос 15 удаа пуужингийн туршилт хийсэн нь сүүлийн хоёр жилийн туршилтын тооноос их байгаа юм.  Мөн Ким Жон Ун цөмийн зэвсгээ боломжит өндөр хурдаар, богино хугацаанд хөгжүүлэхээ өнгөрсөн сард амласан нь ихээхэн асуудал дагуулаад байгаа юм.

Эх сурвалж: CNN