С.САРУУЛ
Эмийн чанар, хяналтын тогтолцооны талаар УИХ-ын гишүүн Ж.Чинбүрэн "Эм үйлдвэрлэх процессын бүх бүрэлдэхүүн хэсгүүдийг чанартай байлгахад түүнийг хянадаг тогтолцоо сайн байхаас аргагүй. Эрүүл мэндийн салбар бүтэн 30 жил тендер гэдэг нэрийн дор дандаа хямд үнэтэй эм авсаар байгаад чанаргүй муу эмээр эрүүл мэндийн салбар дүүрсэн байна. Улсын бүртгэлд ороогүй эмийг ганзагаар зөөх, дэлхий нийтэд хэрэглэхээ больсон эмийг бүртгэлээсээ хасахгүй байх тохиолдол гарч байгаа. Харамч хүн арав дахин төлнө гэдэг шиг нэг хүнийг чанартай эмээр долоо хоног эмчлэх байсныг 14-21 хоног эмчилж байгаа. Монгол Улсад антибиотикт тэсвэртэй халдвар их байна. Шарх, хатгаа, буглаа эдгэхгүй удаж байгаа. Гадаадад очоод антибиотик хэрэглэхээр долоо хоногт эдгэчихдэг. Тийм учраас өвчнийг хурдан эмчилж, хөдөлмөрийн чадвар алдалтыг бууруулах нь эмийн чанартай шууд холбоотой" гэв.
УИХ-ын гишүүн Э.Батшугар "Зарагдаж байгаа эмийн 33 хувь нь хүний эрүүл мэндэд эрсдэл учруулж байна гэсэн судалгаа гарсан. Дахин цэвэрлэсэн тариур орж ирж байна гэх яриа бий. Ямар ч бүртгэлгүй эм зах зээлд зарагддаг. Жижиглэнгийн болон бөөний худалдааг анхаарах ёстой" гэдгийг хэлэв.
Эх сурвалж: www.polit.mn