Ч.ЗОТОЛ

УИХ-ын гишүүн Г.Амартүвшин Халдашгүй байдлын дэд хорооны хурлын дараа  сэтгүүлчдэд тайлбар өглөө.

-УЕП ямар үндэслэлээр таныг яллагдагчаар татах болсон юм бэ?

-Намайг “Вертекс майнинг” гэх компанид давуу байдал үүсгэж, улсад 33 тэрбумын хохирол учруулсан гэсэн үндэслэлээр яллагдагчаар татсан гэж Ерөнхий прокурор  сая тайлбарлалаа. Энэ 33 тэрбумын зээл нь  одоо 16 тэрбумын үлдэгдэлтэй, 9.6 тэрбумыг зээлийн хүүд төлсөн байдаг. Мөн анх байсан барьцаа хөрөнгө нь хэвээрээ  байгаа. Тиймээс яаж хохирол учруулсан нь тодорхой биш байна.

-Зээлийг та өөрийн гарын үсгээр гаргасан уу, ямар байдлаар гаргасан юм бэ?

-Үгүй. Хөгжлийн банк ч байна уу, арилжааны банк ч байна уу, гүйцэтгэх захирал дангаараа ямар нэгэн зээлийн шийдвэрийг гаргадаггүй.  Зээлийн удирдах хорооны найман гишүүн хуралдаж, хамтын шийдвэр гаргадаг. Тэр шийдвэрийг үндэслэн ТУЗ нь есөн гишүүний бүрэлдэхүүнтэй мөн адил хамтын шийдвэрийг гаргадаг. Нийт  16-17  хүн шийдвэр гаргахад  оролцдог.  ТУЗ-ийн шийдвэр гарвал гүйцэтгэх захирал түүнийг биелүүлэх үүрэгтэй байдаг.

-Таныг Хөгжлийн банк гэхээс илүүтэй иргэншилтэй холбоотой асуудлаар шалгаж оруулж  ирж байгаа гэсэн хардлага байна?

-Тийм зүйл байхгүй.

-Улс  төрийн  асуудлаар ч юм уу, өөр  үндэслэл байна уу?

-Миний харж байгаагаар тийм зүйлүүд  байхгүй.

-Халдашгүй байдлын дэд хороо асуудалд хэрхэн хандах бол, та юу гэж бодож байна?

-Мэдэхгүй. Процессын дагуу явна байх.

Эх сурвалж: www.polit.mn