З.БАТЦЭЦЭГ

Хятадын инженерүүд нуранги дор байгаа хүмүүсийг хайх робот харх бүтээжээ. Энэ тухай нийтлэлийг “IEEE Transactions on Robotics” сэтгүүлд нийтэлсэн байна.

Хөлтэй роботууд нь тэгш бус газраар явж чаддагаараа дугуйтай роботуудаас давуу талтай. Хэрэв газар нутаг тэгш бус төдийгүй нарийн нүх, гарцаар дүүрсэн бол робот нь жижиг хэмжээтэй байх ёстой гэнэ. Гэхдээ энэ нь түүний ашигтай ачааллыг бууруулахад хүргэнэ гэж инженерүүд онцолжээ. Бээжингийн Технологийн дээд сургуулийн Цин Ши болон түүний хамтран ажиллагсад бяцхан роботоо “SquRo” гэж нэрлэжээ. Энэ нь хархтай төстэй бөгөөд хөгжлийн явцад инженерүүд түүний хөдөлгөөн, биеийн бүтцийг хуулбарлахыг оролдсон байна. Хархнууд нарийн нүхээр явахад сайн зохицдог бол урт бие нь хангалттай жинтэй байх боломжийг олгодог аж. Роботын хөдөлгөөнийг компьютерээр удирддаг. Хөдөлж байх үед ландшафтыг автоматаар тооцдог аж. Үүний үр дүнд робот бөхийж, гүйж, мөлхөж, эргэж, унасны дараа босож чаддаг давуу талтай болжээ. Тодруулбал, туршилтын явцад робот есөн см-ийн гарцаар мөлхөж, гурван см-ийн хаалтыг давж, 15 хэмийн налуу руу авирч байжээ. Роботын даац нь 200 грамм буюу жингийнх нь 91 хувь юм. Инженерүүд өөрсдийн роботыг барилга нурсны дараа хүмүүсийг олох эсвэл ижил төстэй ландшафтын бусад ажилд хэрэгтэй болно гэж найдаж байна.

Эх сурвалж: “Зууны мэдээ” сонин

2022 ОНЫ ДӨРӨВДҮГЭЭР САРЫН 22. БААСАН ГАРАГ. № 81 (6813)