С.САРУУЛ

Чуулганы пүрэв гарагийн хуралдаанаар Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төслийг хэлэлцэв. Энэ үеэр гишүүдийн олонх нь дэмжихгүй гэсэн кноп дарснаар МАН-ын бүлэг тав хоногийн завсарлага авсан юм. Тендерийн хуулийн өөрчлөлтэй холбоотойгоор зарим гишүүний байр суурийг хүргэе.

-УИХ-ын гишүүн Х.Болорчулуун:

-Сангийн яаманд тендертэй холбоотой гомдлыг хүлээн авдаггүй, тендерийг үзэмжээр  шалгаруулдаг асуудал компаниудын дунд яригддаг. Судалгаагаар 63 хувь нь үндэслэлтэй гомдол байна гэдэг нь хангалттай. Сангийн яамны дархлагдсан дарга нарыг өөрчлөх хэрэгтэй. Хуулиас давсан журам яриад компаниудын гомдлыг авч хэлэлцдэггүй юм билээ.

УИХ-ын гишүүн Г.Тэмүүлэн:

-Шинэ зохицуулалт бий болгох ёстой. 2015 оноос хойш 15 их наядын тендер төрөөс зарласан. Үүнээс 2.3 их наяд төгрөгийн тендерийн урьдчилгаа төлбөр, гүйцэтгэлийн баталгааг арилжааны банкуудад татан төвлөрүүлсэн. Энэ бол ямар их хэмжээний дарамтыг аж ахуй нэгжүүдэд үзүүлдэг нь харагдаж байна. Үүнийг өөрчлөх цаг болсон. Даатгалын баталгааны асуудлыг оруулж ирэх ёстой.

УИХ-ын гишүүн Ё.Баатарбилэг:

-Хууль хэрэгжсэнээр 66 тэрбум төгрөг "сулрах" юм байна. Манай аймаг Сум хөгжүүлэх сангаас машин авсан боловч эвдэрхий байж таарсан. Нийлүүлсэн компанийн хариуцлагагүйн улмаас иргэд хохирч байна. Дэлхий нийтээр цар тахлын улмаас бараа материалын үнэ маш их өсч буй болохоор компаниуд тендерт орохгүй байна. Орон нутагт санаатай болон санамсаргүйгээр улсын комисст хүлээлгээд өгчихсөн барилга их байдаг. Тэгээд хариуцлага ярих гэхээр компани нь аль хэдийнэ барьцаа хөрөнгөө суллачихдаг ийм байдал руу орох гэж байна.

Эх сурвалж: www.polit.mn