Д.ДАРАМБАЗАР

Мицубиши UFJ сангийн тэтгэлгийг Японы MUFG /Эм Юү Эф Жи/ банкны Улаанбаатар дахь төлөөлөгчийн газрын дарга Кикүчи Какзүёши МУИС-ийн 12 оюутанд гардуулах ёслол боллоо. Сургалтын тэтгэлэг гардуулах ёслолын ажиллагаанд Японы талаас ноён Кикүчи Какзүёши, MUFG банкны Улаанбаатар дахь төлөөлөгчийн газрын менежер М.Мөнхзул, Монголын талаас МУИС-ийн Сургалт, оюутан хариуцсан дэд захирал, доктор Б.Бадмаанямбуу, Оюутан төгсөгчийн хэлтсийн дарга, доктор М.Эрдэнэчимэг, мэргэжилтэн Н.Алтанзул болон 2021-2022 оны хичээлийн жилд тус сангийн тэтгэлгийг авах 12 суралцагч оролцлоо. Тэтгэлгийн хүрээнд хоёр улсын нөхөрсөг харилцаа, хамтын ажиллагааг дэмжих хүрээнд суралцагчдын идэвх санаачилгыг нэмэгдүүлж, хүний нөөцийн хөгжилд хувь нэмэр оруулах зорилготойгоор Япон улсын "Mitsubishi UFJ" сан МУИС-тай 2014 онд санамж бичэг байгуулсан.

Энэ  тэтгэлгийг 2014 оноос эхлэн тасралтгүй олгож ирсэн юм. Жил бүр МУИС-ийн байгалийн ухаан, инженерчлэлийн хөтөлбөрийн суралцагчдыг дэмжин зургаан оюутан, бусад салбарын 10 оюутан, нийт 16 оюутанд тэтгэлэг олгож иржээ. Өнөөдрийн байдлаар тус сангийн тэтгэлэгт байгалийн ухааны 30 суралцагч, бусад салбарын 50 суралцагч нийт 80  оюутан хамрагдаж 2020 оноос бизнесийн сургуулийн хөтөлбөрөөс бусад салбарын 24 суралцагчид олгож эхэлснээр 104 суралцагч тэтгэлэг хүртээд байна. Японы "Mitsubishi UFJ" сангийн энэ тэтгэлгийг жил бүрийн арваннэгдүгээр сард зарлан МУИС анхан шатанд сонгон тодорхойлж, эцсийн шатны шалгаруулалтыг Mitsubishi UFJ сан хийж тэтгэлгийн санхүүжилт болох 6000 ам.долларыг сургуулийн данс руу шилжүүлэн олгодог байна.

Эх сурвалж: www.polit.mn