С.САРУУЛ
Цагдан хорих 409 дүгээр хорих ангид хоригдож буй Э.Бат-Үүл өлсгөлөн зарлах болсон талаар түүний өмгөөлөгч А.Пүрэвдулам, хүү Б.Чулуудай нар мэдээлэл хийв.
Б.Чулуудай "Аав минь "Путины колончлол эргэн ирэх үү?" нийтлэлийг гуравдугаар сарын 7-ны өдөр бичсэн. Энэ нийтлэлийг нь прокуророос гаргуулаагүй. Мөн захидал харилцааны эрхийг нь хассан. Надад болон миний охинд бичсэн хоёр захидлыг өгөөгүй. Эрхээ сэргээлгэхээр хандсан боловч шийдвэрлээгүй. Тиймээс хууль ёсны эрхээ сэргээлгэхийн тулд хорих ангид өлсгөлөн зарлах болсноо мэдэгдлээ. Ар гэрийнхэн бид болон өмгөөлөгч нь өлсгөлөн зарлахыг дэмжихгүй байгаа" гэв.
Өмгөөлөгч А.Пүрэвдулам "Э.Бат-Үүлийн гэм буруугийн байдал шүүхээр эцэслэн тогтоогдоогүй. Хорих 409 дүгээр анги бол дамжин өнгөрөх хорих юм. Тиймээс энэ хүний хэвлэн нийтлэх болон захидал харилцааны эрхийг хязгаарлах эрх зүйн үндэс байхгүй" гэв.
Харин Нийслэлийн прокурорын газрын Ял эдлүүлэх ажиллагаанд хяналт тавих хэлтсийн хяналтын прокурор О.Баярсайхан “Э.Бат-Үүлийн хэвлэн нийтлэх, захидал харилцааны эрхийг хаасан гэдэг нь огт үндэслэлгүй мэдээлэл” гэсэн тайлбарыг өглөө.
Эх сурвалж: “Зууны мэдээ” сонин
2022 ОНЫ ГУРАВДУГААР САРЫН 24. ПҮРЭВ ГАРАГ. № 60 (6792)