Ч.ЗОТОЛ

АН-ынхан   4:11 мэдээллийн цагаараа  Хөгжлийн банкны асуудлыг  хөндлөө. Тус намын Ерөнхий нарийн бичгийн дарга, хуульч Ч.Өнөрбаяр  “Эрх баригч намынхан зургаан жил дарсан  Хөгжлийн банкны луйвар, булхайн асуудлаа одоо АН-ынхан руу чихэх  гэж оролдож байна. Та нар амжихгүй шүү” хэмээн хатуу анхааруулав. Тэрбээр цааш хэлэхдээ  “Та бүхэн хаарж байгаа байх. Хөгжлийн банкны асуудал  маш сонин зүй тогтол руу  яваад байна.  2012 оноос 2016  он хүртэл  зээлийн асуудлыг  Удирдах зөвлөл  нь шийддэггүй, заавал УИХ, Засгийн газраар  оруулж байж  шийд гарч,  зээл олгогдож байсан.  МАН төрд  гараад үүнийг  өөрчилсөн. Сонгуулийн мөнгөө хийх, сайд, дарга нар  нь өөрийн хамаарал бүхий этгээдүүдийг санхүүжүүлэх зорилготой байсан. Ингээд зээл олгох  хуулийг 2017 онд  өөочилж, ТУЗ дээрээ  шийдвэр гаргах болсон.  Үүний дараачаас завхрал гарсан. УИХ дахь Ажлын хэсгийн  ахлагч  Б.Баттөмөр гишүүн  өчигдөр хэлж байна лээ “Хоёр  их наяд төгрөг  Засгийн газрын  баталгаагүй олгосон байна” гэж.  Ийм болгочихоод зургаан  жилийн дараа эрх баригчид дуу тавьж байх юм. Сүүлийн  зургаан  жилийн турш өөрсдөө  л эрх барьсан шүү дээ. Зургаан  жил асуудлыг дарж явчихаад өнөөдөр гэнэт дуугарч байх юм. Энэ бол  эрх баригч нарын тавьж байгаа жүжиг. Түүнийгээ АН руу чихэх гэж үзэж байгаа нь  бүр ч  утгагүй.

Өнөөдөр Хөгжлийн банкны завхралыг засахын тулд МАН-ын хурган дарга нар  асуудлыг шалгаж цэгцлэх юм гэнэ. Монголд төр гэж байхаа больж, төр хүчгүйдэж хоосорчээ. Төр хүчгүй учраас нам тэр ажлыг хийх гэнэ. Хөгжлийн банк  нь төрийн банк бус намын халаасны банк болж байгаа юм байна.  МАН-ын Удирдах зөвлөлийн  хэдэн дарга нар  Монгол Улсыг удирддаг юм руу орох гэж байна. Нам, төр хоёр салсан гэж би ойлгодог  шүү,  1992 оны Үндсэн хуулиар. Дээр нь шударга ёсыг тогтооно гэж  мөн л эрх баригч нам доторх хурган дарга нар  яриад байх юм. МАН-ын Хяналтын хороо гэгч шийдвэрлэх юм гэнэ.  Тэнд шүүх, хууль хяналтын байгууллага  хэрэггүй  болж гэнэ. Тиймээс асуух асуулт байна.  Та нар зургаан  жил дуугарахгүй байсан  чинь юуных вэ, хэний чинь  хүсэл зориг байв? Үүнийг  бид асуух ёстой. Өөрсөд рүүгээ ирсэн галыг өөр тийш чиглүүлэх гэсэн ийм л юм яваад  байна. Нэр хүндээ сенсац тарьж бус ажил хийж өсгөдөг юм шүү, МАН-ынхаан. Юм  л бол хойд захын хар   гэгчээр АН руу чихэх гэж үздэг арга чинь хол явахгүй шүү. Одоо цаг өөр болсон.  Бид Хөгжлийн банкны асуудалд ажлын хэсэг гаргасан, судалж байгаа. Удахгүй энэ талаар дэлгэрэнгүй  хэлж ярина” гэлээ.

Эх сурвалж: www.polit.mn