Ч.ЗОТОЛ

УИХ ээлжит бусаар хуралдаж тэтгэвэр, тэтгэмжийг нэмэх асуудлыг Цагаан сарын баярын өмнө шийдвэрлэх нь гэсэн мэдээлэл гарсан.  Маргааш ээлжит бус чуулганыг эхлүүлэх УИХ-ын даргын захирамж  мөн гараад байгаа юм. Ээлжит бус чуулганаар тэтгэврийн доод босго 350 мянган төгрөгийг  500.000 болгох, бага тэтгэвэр авч буй ахмадуудын тэтгэврийг  нэмэгдүүлэх, халамжийн тэтгэврийн хэмжээ болон байнгын асаргаа шаардлагатай 16 хүртэлх насны хүүхдэд олгох тэтгэмжийн хэмжээг 288.000 төгрөг хэвээр үлдээх зэрэг  асуудлыг төсөвт тодотгол хийж шийдэхээр болжээ.  Үүнд ойролцоогоор 700 орчим тэрбум төгрөг шаардагдах тооцоо байгааг УИХ-ын гишүүн, Нийгмийн бодлогын байнгын хорооны дарга  М.Оюунчимэг хэллээ.  Засгийн газрын зүгээс нэн яаралтай бус, тухайлбал  зураг, ТЭЗҮ нь байхгүй  зарим хөрөнгө оруулалтыг царцаах замаар дээрх санхүүжилтийг босгох бодлого барин ажиллаж байгаа юм.  Нийгмийн бодлогын байнгын хороо өмнө нь энэ асуудлаар Хөдөлмөр, нийгмийн хамгааллын  сайдад үүрэг чиглэл өгч байв. Тэгвэл  Ерөнхийлөгч У.Хүрэлсүх тэтгэвэр, тэтгэмжийг нэн яаралтай нэмэгдүүлэх чиглэлийг  Засгийн газарт өгсөн нь яригдаж байсан асуудалд  түлхэц болж Цагаан сарын баярын өмнө УИХ-аар хэлэлцэж эцэслэн  шийдвэрлэхээр болжээ.

Эх сурвалж: www.polit.mn