Ч.ЗОТОЛ

Өнөөдөр Улсын Их Хурлын 2021 оны намрын ээлжит чуулган хаалтаа хийх бөгөөд ээлжит  хуралдаанаар БОАЖ-ын сайд, Төрийн нарийн бичгийн дарга болон зарим оронд суух Элчин сайд нарын томилгоо, Засгийн газраас өргөн мэдүүлсэн Журам батлах тухай УИХ-ын тогтоолын төслийг хэлэлцэхээр товлосон. Хуралдааны эхэнд тогтоолын төслийг хэлэлцэхийг гишүүдийн олонх дэмжсэн тул уг асуудлыг эцсийн хэлэлцүүлэгт бэлтгүүлэхээс холбогдох байнгын хороонд шилжүүллээ. Элчин сайд нарыг эргүүлэн татах, томилох асуудлаар зөвшилцөх Монгол Улсын Ерөнхийлөгчийн саналыг хэлэлцэж байна. Ерөнхийлөгчийн зүгээс Элчин сайд нарыг эгүүлэн татах, томилох асуудлаар УИХ-д дараах зөвшилцөх саналыг өргөн мэдүүлсэн байна. Үүнд: 

• Монгол Улсаас Бүгд Найрамдах Солонгос Улсад суугаа Онц бөгөөд Бүрэн эрхт элчин сайд Намсрайн Эрдэнэтуяаг эгүүлэн татаж, Монгол Улсаас Бүгд Найрамдах Солонгос Улсад суух Онц бөгөөд Бүрэн эрхт Элчин сайдаар Эрдэнэцогтын Сарантогосыг;
• Монгол Улсаас Кувейт Улсад суугаа Онц бөгөөд Бүрэн эрхт Элчин сайд Зоригтын Чинтүшигийг эгүүлэн татаж, Монгол Улсаас Кувейт Улсад суух Онц бөгөөд Бүрэн эрхт Элчин сайдаар Пүрэвийн Сэргэлэнг;
• Монгол Улсаас Швейцарын Холбооны Улсад суух Онц бөгөөд Бүрэн эрхт Элчин сайдаар Даваасүрэнгийн Гэрэлмаа нарыг тус тус томилохоор тусгажээ.

УИХ-ын чуулганы хуралдаанаар хэлэлцээд Монгол Улсаас Бүгд Найрамдах Солонгос Улсад суух Онц бөгөөд Бүрэн эрхт элчин сайдаар Э.Сарантогосыг томилохыг 80.8 хувийн саналаар, Монгол Улсаас Кувейт Улсад суух  Онц бөгөөд Бүрэн эрхт Элчин сайдаар П.Сэргэлэнг томилохыг 86.5 хувийн саналаар, Швейцарын Холбооны Улсад суух Онц бөгөөд Бүрэн эрхт Элчин сайдаар Д.Гэрэлмааг томилохыг 88.5 хувийн саналаар тус тус дэмжив.

Эх сурвалж: Polit.mn