Ч.ЗОТОЛ

Нийслэлийн ИТХ-ын Хүний хөгжлийн хорооны ээлжит хуралдаанаар дүүргийн хамгаалалтад байх түүх, соёлын үл хөдлөх дурсгалын жагсаалт батлах асуудлыг хэлэлцэв.
Соёлын өвийг хамгаалах хуулийн дагуу түүх, соёлын үл хөдлөх дурсгалын улсын үзлэг, тооллогыг 2015 онд зохион байгуулсан. Уг  тооллогоор нийслэлийн нутаг дэвсгэрт 217 дэсийн 479 дурсгалыг бүртгэн Соёлын өвийн мэдээллийн санд оруулжээ.  Хуулийн дагуу эдгээр түүх, соёлын үл хөдлөх дурсгалаас дүүргийн хамгаалалтад авах шаардлагатай жагсаалтыг боловсруулан гаргасан  байна. Үүнд,  хөшөө дурсгал, эртний булш, цогцолбор, баримал, байшин зэрэг 144 түүх, соёлын үл хөдлөх дурсгал багтжээ.

Хэлэлцүүлгийн үеэр НИТХ-ын төлөөлөгч Г.Гангамөрөн “Түүх  соёлын дурсгалууд дотор  сэргээн засварлах шаардлагатай өв олон байна. Иймд  сэргээн засварлах ажил, цаашид соёлын өвийг хамдгалж, хамгаалж авч явах менежментэд анхаарах хэрэгтэй” гэв. Төлөөлөгч Т.Отгонболд “Соёлын өвийг хамгаалалтад авахаас гадна үүгээр дамжуулан нийслэл хот орлого олдог байх боломжийг нь нээж өгөх шаардлагатай. Мөн залуучуудад соёлын өвийг таниулах, ойлгуулах ажил чухал. Энэ чиглэлд мэргэжлийн байгууллагууд  анхаарах хэрэгтэй” гэлээ.

Уг асуудлыг нийслэлийн ИТХ-ын ээлжит XII хуралдаанаар хэлэлцэхийг Хүний хөгжлийн хороо дэмжив.  Ээлжит  XII хуралдаан энэ сарын 24-ний өдөр болох бөгөөд эцсийн шийдвэрийг гаргах юм. 

Эх сурвалж: www.polit.mn