Б.ДАМДИН-ОЧИР

Ажин түжин байсан Монголын улс төрд гал ноцож магадгүй болоод байна. Эрх мэдэл, хариуцлагаас бултах гэсэн хэдхэн хүний ердөө тав хоногийн “түүх”-тэй богино зайны улс төр Монголд гай тарьж ч мэдэхээр болжээ.

Өнгөрсөн даваа гаригт “Рио Тинто”,  “Туркойз Хиллс Ресурсэс” компаниас Ерөнхий сайдын нэр дээр захидал ирүүлсэн. Нийтээрээ талархаж хүлээж авсан. Харин энэ нь Америкт нуугдсан экс Ерөнхий сайд, Францад очоод хэвчихсэн экс Ерөнхийлөгч нарт таалагдаагүй байна. Учир нь Оюутолгойн хувь нийлүүлэгчдээс Монголын Засгийн газарт 22 тэрбум ам.долларыг тэглэж, Дубайн гэрээг цуцлах, цаашид хамтрах таатай саналуудыг тавьсан нь эдгээр хүмүүсийн эрх мэдэлтэй байхдаа хийсэн үйл ажиллагаа буруу байсныг нотолсон хэрэг болсон юм. Монголд уг захидлыг танилцуулж байхад Америкт экс Ерөнхий сайд татаж унаад эмнэлгийн тусламж авч эндэх садангуудаа сандаргасан зэргээс үүнийг бэлхнээ ойлгож болно.

Ингэж нүх рүүгээ ус цутгуулсан хулгана шиг сандралдсан “экс”-үүд “Рио Тинто”-гийн захидал дагасан хөөрлийг дарах, тэр дүйвээнээр АН-ын тамгыг авах маш нарийн операци зохиожээ.

Ингээд шүүх, прокурор, мөрдөгчдийн дунд хэдэн жил “явсан” Э.Бат-Үүлийн хэргийг яаралтай шийдүүлжээ. Өөрөөр хэлбэл, тэд өөрсдийн томилсон Эрүүгийн хэргийн анхан, давж заалдах шатны шүүхийн нэр бүхий шүүгчидтэй ярьж шахалт үзүүлсэн. “...Бат-Үүл тэртэй тэргүй хорих ял авах бол он солигдохоос өмнө шийд” гэсэн тухай мэдээлэл байгаа юм. Нөгөөдүүл нь үүнийг биелүүлж Э.Бат-Үүлд дөрвөн жилийн хорих ял оноосон байгаа юм.

Энэ асуудал өнөөдөр ил болж АН-ынхан дотроо хагараад эхэлсэн байна.

АН-ынханд уурсаж ундууцах өөр том шалтгаан гарч иржээ. Тэр нь, нөгөөх “экс”-үүд энэ сарын 20 буюу ирэх даваа гаригт Дээд шүүхээр хэлэлцэх АН-ын тамганы маргаанд ямар цэг хатгахыг бас тохирчихсон тухай мэдээлэл юм. Дээд шүүхийн 20-ны хурлаас О.Цогтгэрэлийг АН-ын даргаар бүртгүүлэхээр шахсан нь бас ил болоодохжээ.

Тэр байтугай О.Цогтгэрэл АН-ын тамгыг авангуутаа Франц руу нисч “экс”-тэй уулзахаар зэхэж байгааг ч АН-ынхан мэджээ.

Энэ нь хэрүүл дээр нь бүр ч тос нэмж, хагарал нь сэдрээд, АН-ынхан яг одоо Төрийн ордонд ид түжигнэж байна.

Маш ноцтой нэг асуудал бол “Турзойз Хиллс Ресурсэс”-ын зарим төлөөлөл “Рио Тинто”, “Туркойз Хиллс Ресурсэс”-ийн Монголын Засгийн газарт тавьсан саналыг эсэргүүцсэн мэдэгдэл гаргаад байна. “...Жоомоо алах гээд байшингаа шатаана” гэдэг шиг хэдхэн хүний эрх мэдэл, эрх ашгийн төлөөх мугуйдал бүтэн улсаар нь хохироож баллах вий.

Эх сурвалж: www.polit.mn