З.БАТЦЭЦЭГ

XXI зууны манлайллын төлөөх өрсөлдөөнд АНУ бусад улсыг ялах эсэх нь ойрын хэдэн жилд тодорхой болно. Энэ талаар АНУ-ын ерөнхийлөгч Жо Байден лхагва гарагт хэлэхдээ АНУ-ын хувьд энэ асуудалын шийдвэрлэх мөч ирснийг онцлон тэмдэглэв. “Одоогоос 50 жилийн дараа түүхчид сүүлийн хоёр жил, дараагийн 4-5 жилийн байдлаар Америк XXI зууны лидер байх өрсөлдөөнд ялсан уу, ялагдсан уу гэдгийг судлах болно гэдэгт би итгэлтэй байна” гэж өөрийн орны дэд бүтцийг хөгжүүлэх хөтөлбөрийг дэмжиж байгаагаа Америкийн удирдагч Мичиган мужийн Детройт дахь Женерал Моторс үйлдвэрт үг хэлэхдээ мэдэгдэв. "Бид бусад улс оронд хохирол учруулах шаардлагагүй. Бид тоглоомд буцаж орох хэрэгтэй. Хэрэв буцаж орохгүй бол Ойрхи Дорнодын хямралыг өөр хэн шийдвэрлэх вэ. Израиль-Палестины асуудлыг хэн шийдэх вэ. Энэ бүх асуудлыг хэн шийдэх вэ" гэж хэллээ.

Ж.Байден энэ сарын 16-нд Конгрессоос баталсан хуулийн төсөлд гарын үсэг зурж, тус улсын дэд бүтцийн хөгжилд нэг их наяд гаруй ам.долларын хөрөнгө оруулалт хийхээр болжээ. Төлөвлөгөөнд гүүр, зам барихад 110 тэрбум ам.доллар, тээврийн аюулгүй байдлын хөтөлбөрт 11 тэрбум ам.доллар зарцуулахаар тусгасан байна. Нийт 39 тэрбум ам.долларыг нийтийн тээврийн шинэчлэлд, 42 тэрбум ам.долларыг боомт, агаарын боомтуудын дэд бүтцийг хөгжүүлэхэд зарцуулахаар төлөвлөж байгаа юм. Энэ дэд бүтцийн хөгжлийн төлөвлөгөө нь Хятад болон бусад том оронтой эдийн засгийн өрсөлдөөнд АНУ-ыг ялах боломжийг олгоно гэж үзэж байгаагаа өмнө нь АНУ-ын ерөнхийлөгч дурдсан.

Эх сурвалж: www.tass.ru