Ч.ЗОТОЛ
УИХ-ын Эдийн засгийн байнгын хорооны хуралдаанаар Жолоочийн даатгалын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэж байна. Хуулийн төслийн танилцуулгыг УИХ-ын Т.Аюурсайхан хийсэн юм. Тэрбээр “Жолооч нарын хохирлыг бодитой үнэлдэг болно. Өнөөдөр тийм биш байгаа. Осол гарлаа гэхэд хохирлыг бүрэн гүйцэд олгодог болох юм. Даатгалын зарим компанид 28 нөхцөл шаардлагыг хангах юм бол нөхөн төлбөрөө авч байна. Авахдаа дутуу авдаг. Энэ байдлыг арилгана.
Зам тээврийн бодлогыг хэрэгжүүлэхэд жолоочийн хариуцлагын албан журмын даатгал уялдах ёстой. Осол гардаг шалтгаан, хар цэгүүд нь тодорхой. Зам тээврийн ослын 98 хувь нь жолоочийн хариуцлагагүй үйлдлээс шалтгаалсан тухай статистик сүүлийн арван жилд нэг түвшинд үргэлжилж байхад даатгуулагчийн хариуцлагыг өндөржүүлэх, замын хөдөлгөөний аюулгүй байдлыг хангахтай холбоотой нэгдсэн зохион байгуулалттай арга хэмжээг аваагүй, тийм нэгдсэн бодлого, арга хэмжээ хэрэгжүүлэх боломж одоогийн бүтэц, зохион байгуулалттай үед хэрэгжих боломжгүй гэдэг нь өнгөрсөн хугацааны амьдралаас харагдаж байна.
Жолоочийн хариуцлагын албан журмын даатгалыг хувийн хэвшлийн арилжааны даатгалын компаниуд эрхэлж байгаа нь хуулийн агуулга, мөн чанарыг алдагдуулж, нийгэмд үйлчлэх биш ашиг олох хэрэгсэл болгожээ. Энэ нь "Хохирогчдын эрх ашгийг хамгаалах" Жолоочийн даатгалын тухай хуулийн үндсэн зорилтоос гажиж, ашгийн төлөө арилжааны даатгалын шинж чанартай болгож, улмаар нийтийн ашиг сонирхлыг хамгаалах үндсэн ач холбогдлыг бууруулсан.
Монгол Улсын бүх арилжааны даатгалын компаниуд, түүний аймаг дахь салбар, төлөөлөгчид болон зуучлагч компаниуд, хохирол үнэлэх компаниуд нийт 3000 гаруй хүн энэ даатгалыг хийхэд оролцож даатгуулагчдын төлөх хураамжийн орлогоос хувь хүртэж байгаа нь даатгалын хураамжийн хэмжээг үлэмж нэмэгдүүлж, олон нийтийн ашиг сонирхолд хохирол учруулж байна. Монгол Улсын хуулиар иргэдээс албан журмаар хураамж төвлөрүүлж эрүүл мэнд, амь нас эд хөрөнгөөрөө хохирсон хүнд зам тээврийн ослын хохирол олгох, үлдсэнийг нь арилжааны даатгалын компанийн эздийн өмч болгож байгаа нь энэ хууль баталж хэрэгжүүлсэн эцсийн зорилготой нийцэхгүй байна” гэв.
Эх сурвалж: www.polit.mn