С.УЯНГА

“Рио Тинто”-гийн Зэсийн группийн захирал Б.Болд, "Tуркойз хилл" компанийн гүйцэтгэх захирал Стив Тибоу нар Засгийн газрын Ажлын хэсгийн ахлагч Х.Нямбаатарт захидал хүргүүлжээ. Тэгвэл тус захидалд Монгол Улсын Засгийн газарт хандсан дөрвөн саналыг дэвшүүлжээ.

-Нэгдүгээрт, Засгийн газрын эзэмшиж буй 34 хувийн хувьцаанд ногдох зээл 2.3 тэрбум ам.доллар. Үүний 70 хувь буюу 1.6 тэрбум ам.долларыг тэглэх.

-Хоёрдугаарт, ногдол ашиг авах хугацааг наашлуулж, 350 сая ам.долларын дэмжлэгийг гурван жилийн хугацаанд олгох.

-Гуравдугаарт, гүний уурхайн бүтээн байгуулалтын санхүүжүүлэлт 4.2 тэрбум ам.долларын зээлийн баталгааны шимтгэлийг Рио Тинто төлөх үүрэг хүлээсэн. Тэгвэл Рио Тинто зээлийн шимтгэлийг тэглэх саналаа дурджээ.

- Дөрөвдүгээрт, гүний уурхайн бүтээн байгуулалтын зардал 1.4 тэрбум ам.доллароос хэтрэх нь тодорхой болсон. Тэгвэл 1.4 тэрбум ам.доллароос менежментийн төлбөр авахгүй.

Энэ талаар ХЗДХ-ийн сайд Х.Нямбаатар сайд “11 дүгээр сарын 7, 8-ны өдрүүдээс хэтрэхгүйгээр бид Рио Тинто групп, Оюу Толгой компанитай Монгол Улсын Засгийн газар эрчим хүч тогтвортой нийлүүлэх гэрээнд гарын үсэг зурах бэлтгэл ажил хангагдаж байгаа. Хэлэлцээ тодорхой хэмжээнд урагшилж байгаа хэдий ч бидний хүссэн үр дүнд хүрэхгүй. Өөрөө хэлбэл хөрөнгө оруулалтын гэрээг сайжруулах гэдэг УИХ-ын тогтоолыг хэрэгжүүлэх боломжуудыг нөгөө талд удаа дараа тавьж байгаа боловч хэлэлцээ хийж байгаа тал Хөрөнгө оруулалтын гэрээнд өөрчлөлт оруулах ямарваа нэгэн үйлдэл хийгээгүй. Айлын тал хөрөнгө оруулалтын гэрээнд өөрчлөлт оруулахыг зөвшөөрөөгүй тохиолдолд 1000 зөвлөх авчраад энэ яриа хэлэлцээ урагшлахгүй. Монголын Засгийн газар хөрөнгө оруулалтын гэрээг сайжруулах чиглэл рүү л явж байгаа. Сүүлийн үед хөрөнгө оруулалтын гэрээг сайжруулах Засгийн газрын дарамт шахалтыг саармагжуулах үүднээс элдэв жагсаал цуглаан, акц зохион байгуулж байна. Хэлэлцээр хийж байгаа Засгийн газраа шалтгаангүйгээр огцор, тар гэж байгаа нь ихэд эргэлзээ төрүүлж байна. Өмнөх хэлэлцээрийн явцад бид үүнээс илүү саналуудыг явцад тавьсан. Рио Тинтогийн дээрх дөрвөн саналыг ажлын хэсэг хэлэлцээд Ерөнхий сайдад танилцуулна" гэлээ.

Рио Тинто группийн Зэсийн группийн захирал Б.Болд тэргүүтэй хэлэлцээрийн багийнхан өнөөдөр 14:00 цагт Монгол Улсын Засгийн газрын хэлэлцээрийн багтай Төрийн ордонд уулзаж, уулзалт хийх юм байна.

Эх сурвалж: www.polit.mn