С.САРУУЛ
Уул уурхайн “Страто” компанийн уншигчид андахгүй. Энэ компани Дорноговийн Шивээговь буюу Чойрт нүүрс угаах үйлдвэртэй. Тавантолгойн нүүрсийг угааж баяжуулаад экспортод гаргадаг. Харин олонд танил болгосон хүн нь ЕТГ-ын дарга асан З.Энхболд. Бүхий л цаг үед, тэр дундаа эрх ашиг нь зөрчигдөх бүрт Зи-тэй холбогддог. Жаахан тодруулбал, “Страто” ХХК-ийн үүсгэн байгуулагч, хувь эзэмшигч Ачитсайханы Баттүшиг бол Зандаахүүгийн Энхболдын төрсөн дүү Зандаахүүгийн Хишигтогтохтой хамтран байгуулж, хамтран эзэмшдэг.
Тэгвэл З.Энхболдын ээлжит эрх ашиг яг одоо Төв талбай дээр “зогсч” байна. Түүний хамаарал бүхий хүмүүсийн эрх ашиг нүүрс тээвэртэй холбоотойгоор хөндөгдсөн учраас Төрийн ордны өмнө тээвэрчдийн нэрийг барьсан “СТРАТО” компанийнхан жагсч байна гэж хэлж болохоор. Яг үнэндээ бол Страто-гийн хөлд үрэгдэж буй жинхэнэ хохирогчид нь малчид, нутгийн иргэд юм. Тэд тоос татуулсан шороонд дунд амьдарч байгаа учраас байнга гомдол гаргаж байдаг ч тоогоогүй явж ирсэн. Харин энэ удаа Стратогийн замыг хааж, тээвэрлэлт зогссон учраас эрх ашиг нь хөндөгдөж, ийнхүү талбай дээр аргаа олох гэж зүдэрч яваа тээврийн жолооч нарын нэрийг барьж улс төр хийж байгаа бололтой.
Энэ компанийн талаар өнгөрсөн жил Эдийн засагч Л. Наранбаатар хэлэхдээ “Страто компани 2015 оны долдугаар сард байгуулагдсан бөгөөд 2015 оны дөрөвдүгээр сард З.Энхболд Тавантолгойн хөрөнгө оруулалтын гэрээг унагаж, “Эрдэнэс таван толгой” ХХК-нд 30 сая тонны хүчин чадал бүхий баяжуулах үйлдвэр барих боломжийг хаасан. Эдийн засгийн тооцоогоор үүнээс болж, 11 тэрбум ам.долларын экспортын орлого хийх, үндсэн тооцооноос алдагдсан боломж нь 8,4 тэрбум ам.доллар байна. Гэрээг унагаснаас хойш хоёр сарын дараа байгуулагдсан “Страто” компани өнөөдөр “Эрдэнэс Таван толгой” ХХК-ий нүүрсийг угааж, ашиг хийж байгаа. Тухайн орлогоос З. Энхболдын төрсөн дүү З.Хишигтогтох компани байгуулагдсан өдрөөс эхнэр Т.Бат-Өлзийгийн дүү Т.Батдэлгэр 2018 оны аравдугаар сараас эхлэн цалин авсан. Мөн ЖДҮ-гийн 950 сая төгрөгийн асуудал гарч ирж байгаа ба миний таамаглаж буйгаар З.Энхболд УИХ-ын дарга байх үедээ н.Батсүх, З.Хишигтогтох, Ж.Даваасүрэн гэх мэт өөрийн төрөл төрөгсөд болон намын ураг нэгтэй нөхдүүдээр дамжуулан ЖДҮ-г хийж байсан загалмайлсан эцэг байсан уу гэдгийг хууль хяналтын байгууллага шалгахгүй байна вэ гэдгийг онцолмоор байна” гэж байв.
Эх сурвалж: www.polit.mn