Б.ЖАРГАЛ

Цар тахал эдийн засаг, төсвийн гүйцэтгэлд хүндрэл учруулсаар байна. Тухайлбал, нийслэлийн зарим дүүрэгт төсвийн төлөвлөгөө бүрэн биелэгдсэн бол зарим дүүрэгт тасалджээ. Энэ талаар НИТХ-ын Эдийн засаг, төсвийн хороо хуралдаж нийслэлийн хотын шуудын 2020 оны төсвийн гүйцэтгэл батлах тухай болон ирэх оны төсөвт өөрчлөлт оруулах тухай асуудлыг хэлэлцэв. Нийслэлийн Засаг даргын Хүний хөгжил, нийгмийн бодлогын асуудал хариуцсан орлогч Ж.Сандагсүрэн “2020 онд эдийн засаг, санхүүгийн хүндхэн сорилттой тулгарсан. Төсвийн төлөвлөгөө төрөл тус бүр дээр тасарсан байна. Дэлхий нийтийг хамарсан цар тахлын нөлөөлөл 2020 оны төсөвт тусаад зогсоогүй 2021 онд ч сайнгүй нөлөө үзүүллээ. Төсвийн төлөвлөгөөг зарим дүүрэг амжилттай сайн биелүүлсэн бол зарим дүүрэгт маш өндөр дүнтэй тасалдсан” гэв. Түүнчлэн татварын орлого 2020 онд төлөвлөсөн хэмжээнд хүрээгүй байна. Энэ нь хөл хорио, аж ахуйн нэгж, байгууллагуудын үйл ажиллагаа доголдсонтой холбоотой юм. Мөн урсгал болон хөрөнгө оруулалтын зардал ч төлөвлөсөн хэмжээгээр биелээгүй зэрэг төсвийн гүйцэтгэлтэй холбоотой асуудал үүсээд байгаа аж. 
Тиймээс нийслэлийн төсвийн орлого, бүрдүүлэлтийг нэмэгдүүлэх, төсвөөс татаас авдаг дөрвөн дүүрэг болон нийтийн тээврийн салбарын татаасыг бууруулах боломжийг судалж, урсгал зардлыг багасгаж, хөрөнгө оруулалтын зардлыг нэмэгдүүлэхэд анхаарч ажиллахыг хуралдаанаар онцлов. Түүнчлэн нийслэлийн төсөвт шинэчлэл хийж цар тахлын онцгой нөхцөлд тохирсон төсөв боловсруулахыг холбогдох алба, агентлагт үүрэг болголоо. Нийслэлийн хотын шуудын 2020 оны төсвийн гүйцэтгэл батлах тухай, Нийслэлийн 2021 оны төсөвт өөрчлөлт оруулах тухай хоёр дахь удаагийн хэлэлцүүлэг  аравдугаар сарын 7-нд НИТХ-ын хурлаар  үргэлжилнэ.

 Эх сурвалж:www.polit.mn