С.САРУУЛ

Япон Улсын Тоттори мужид өнөөдөр буюу долдугаар сарын 7-ны өдрийн өглөөнөөс эхлэн их хэмжээний аадар бороо орж, үдээс хойш 16:00 цагийн байдлаар бүтэн нэг сард орох хэмжээний бороо орсон байна. Үүнээс улбаалан тус мужийн гол, горхиуд үерлэж, уулын нуранга үүсэх аюултай нөхцөл байдал үүсээд байна. Үүнтэй холбогдуулан  мужийн захиргаанаас ард иргэддээ хандаж амь насаа хамгаалах, аюулт нөхцөл байдлаас урьдчилан сэргийлэх арга хэмжээ авахыг анхааруулсаар байна. Одоогийн байдлаар бэртэж гэмтсэн хүн байхгүй байгаа хэдий ч 70 орчим айлын амины орон сууцанд их хэмжээний уснаас үүдэлтэй эвдрэл үүсээд байна.

Япон Улсын цаг уурын ерөнхий газраас “Энэхүү аадар бороо цаашид тодорхой хугацаанд үргэлжлэх төлөвтэй байгаа бөгөөд 8-ны өдөр Кюүшюү арал хавьцаа шилжих өндөр магадлалтай буй” гэдгийг анхааруулж байна.

Иймд тус ЭСЯ-наас Чюүгокү болон Кюүшюү бүсэд оршин суугаа иргэддээ аадар борооноос үүдэн гарч болзошгүй хөрсний гулгалт зэрэг байгалийн гамшигаас болгоомжлохыг анхааруулж байгааг Элчин сайдын яамнаас мэдээллээ.

Эх сурвалж: www.polit.mn