З.БАТЦЭЦЭГ

Хоол зүйч Маргарита Арзуманян Оросын “Спутник” радиод өгсөн ярилцлагадаа халуунд идэхэд хамгийн тохиромжтой хоолыг шөл гэжээ. Түүний хэлснээр халуунд хөлс их ялгарч, хүн дулааны тэнцвэрээ олдог байна. Хөлсөөр бид эрдэс давс, микроэлементүүдээ алддаг байна. Энэ алдагдлыг шөлөөр нөхөх нь хамгийн зөв гэж Арзуманян хэлсэн байна. “Хамгийн гол нь халуунд идэх хоолонд хангалттай уураг, усанд уусдаг витаминууд, эрдэс бодис ихтэй, ханасан өөх багатай байх хэрэгтэй” гэж мэргэжилтэн онцолсон байна.

“Халуун, бүлээн шөлтэй хоол нь дулааны улиралд хөлс ялгаруулалтыг нэмэгдүүлж, сэрүүцүүлэх үйлдэлтэй. Хэт хүйтэн бол болохгүй. Их хүйтэн хоолыг шингээхэд хүний бие их дулаан зарцуулдаг. Ингэснээр улам халууцах мэдрэмж төрдөг” гэж тэрбээр тайлбарлалаа.

Үүнээс өмнө хоол зүйч Гинзбург халуунд зайрмаг тусгүй гэж хэлж байсан. Хүйтэн хүнс, уух зүйл нь залгиур, гүйлсэн булчирхайг хэт хөргөж, янз бүрийн халдварт өртөмтгий болгон ханиад амархан хүргэдэг. Чихрийн шижинтэй, даралт ихэддэг хүмүүс зайрмаг хэтрүүлэн хэрэглэх нь аюултай тул халуунд ногоон цай, жимсний шүүс, компот уух нь тохиромжтой гэжээ.

Эх сурвалж: www.lenta.ru