Б.ДОЛЖИНЖАВ

Хөдөлмөрийн үндэсний намаас ерөнхийлөгчийн сонгуультай холбоотой асуудлаар өнөөдөр мэдээлэл хийлээ. 

 ХҮН-аас Ерөнхийлөгчийн сонгуульд нэр дэвшигч Д.Энхбатын сонгуулийн ерөнхий менежер, УИХ-ын гишүүн Т.Доржханд "Энэ удаагийн сонгууль ямар нэгэн байдлаар бие биенээ харлуулж гүтгээгүй болон зардал багатай сонгууль болсон нь онцлог байлаа.Нийгмийнхээ хүлээлтийг хүлээн авч хамгийн олон санал авсан МАН-ын дарга У.Хүрэлсүх танд баяр хүргэж, амжилт хүсье. Монгол төрийн эрхэм хүндтэй энэхүү албыг зургаан жил нэр төртэйгээр хашна гэдэгт итгэж байна. Мөн бидэнтэй өрсөлдсөн АН-ын дарга С.Эрдэнэ танд мөн талархлаа илэрхийлж цаашдын ажил амьдралд тань сайн сайхныг хүсье. Энэ удаагийн сонгуульд гурван нэр хүндтэй эрхэм өрсөлдсөний нэг нь Дангаасүрэнгийн Энхбат байлаа. Бидэнд итгэж саналаа өгсөн 246955 сонгогчдоо нэр дэвшигчийнхээ өмнөөс болон ХҮН болон "Зөв ХҮН электорат" эвслийнхээ өмнөөс талархлаа илэрхийлж байна. 2020 оны сонгуульд оролцож байхад Хөдөлмөрийн үндэсний намд 209 мянган иргэн саналаа өгсөн байдаг бол нэг жилийн дараа 250 мянга болжээ. Өөрөөр хэлбэл бидний дэмжигчдийн тоо өссөн хэвээр байна. Бид цаашид ч Монголын улс төрд шинэ салхийг салхилуулах, эрүүл улс төр авч ирэх, зөв хүмүүсийг нэр дэвшүүлэх болно гэсэн итгэл үнэмшлийг энэ удаа ч мөн авч чадлаа.Манай нэр дэвшигч нэлээд олон хэсэгт ялалт байгуулсныг цохон тэмдэглэе. Ялангуяа гадаадад байгаа Монголчууд их идэвхтэй оролцлоо. Нийт өгсөн саналын 75.4 хувь нь "Зөв ХҮН электорат" эвслээс нэр дэвшигч Д.Энхбатад өгсөн байна. Манай эвслийн хувьд 1.2 тэрбум төгрөгийн зардал гаргасан. Энэ бүх мөнгө хандиваар бүрдсэн бөгөөд гадаадад байгаа Монголчууд шилжүүлсэн” гэж ярилаа.

Эх сурвалж:www.polit.mn