Б.ОД

Олон Улсын Парламентын Холбоо (ОУПХ)-ноос Нэгдсэн Үндэстний Байгууллагатай хамтран зохион байгуулсан ДОХ/ХДХВ-ын асуудлаарх НҮБ-ын дээд хэмжээний цахим уулзалтад Монголын парламентыг төлөөлж Улсын Их Хурлын гишүүн Ж.Чинбүрэн оролцлоо.

 Энэ удаагийн цахим уулзалт “2030 он гэхэд ДОХ-ыг даван туулахад тэгш бус байдлыг шийдвэрлэхэд парламентын үүрэг” сэдвийн хүрээнд болсон юм. Оролцогчид ДОХ-той тэмцэх тогтвортой хөгжлийн зорилтыг биелүүлэхэд улс орнуудын парламентуудын үүрэг оролцоо, цаашид авч хэрэгжүүлэх үйл ажиллагааны чиглэлийн талаар ярилцаж, санал солилцлоо.

Энэ үеэр УИХ-ын гишүүн Ж.Чинбүрэн “COVID-19 цар тахлын халдвар нь бидний өмнө урьдчилан таамаглаагүй сорилтуудыг авчирч, нийгмийн эрүүл мэндийн тогтолцоонд хүндрэл үүсгэлээ.Цар тахлын үед ХДХВ/ДОХ-ын халдвартай иргэдийн эрүүл мэндэд үзүүлэх нөлөөллийн талаар ярих хэрэгтэй. Одоогоор олон улсын эрдэмтэд COVID-19 болон ХДХВ/ДОХ-ын талаарх судалгааг хийж байна. Эрүүл мэндийн тогтолцооны хүчин чадлыг сайжруулах, тархалт өндөртэй улс орнуудад сөрөг нөлөөллөөс урьдчилан сэргийлэх вакцинжуулалтыг хийхэд дэмжлэг үзүүлэх шаардлагатай. ДОХ/ХДХВ-ын халдвартай иргэдийг ялгаварлан гадуурхах, жендэрийн байдлаар тэгш бусаар хандах, эрүүл мэнд, боловсрол болон бусад шаардлагатай үйлчилгээ авах эрхийг хязгаарлах зэрэг сөрөг хандлага буурахгүй байгаа нь халдварын тархалтыг нэмэгдүүлэхэд нөлөөлж байна. Иймээс хүний эрхийг хангах, эрүүл мэндийн салбарт шаардлагатай хөрөнгө оруулалтыг нэмэгдүүлэх, ХДХВ-ын хариу арга хэмжээнд үзүүлэх хууль тогтоомжийн үр нөлөөг сайжруулахад парламентын үр дүнтэй оролцоо, дэмжлэг чухал юм” гэв.

Эх сурвалж:www.polit.mn