Б.ДОЛЖИНЖАВ

Дэлхийн 200 гаруй эрдэмтэн судлаач COVID-19-ийн эрсдэлээс хамгаалахын тулд хүн амынхаа витамин Д-гийн хэрэглээг нэмэгдүүлэхийг улс орны Засгийн газруудад уриаллаа. Учир нь судалгаагаар витамин Д-гийн хэрэглээ багатай хүн COVID-19-ийн халдвар авсан тохиолдолд эмнэлэгт хэвтэх болон нас барах магадлал нь өндөр гэсэн дүн гарчээ. Энэ талаарх дэлгэрэнгүй мэдээллийг “vitaminDforAll.org” сайтаас орчуулан хүргэж байна.

Витамин Д амин дэмийн талаар хүн бүр зайлшгүй мэдэх шаардлагатай ч ихэнх хүний энэ витамины талаарх мэдлэг хангалттай байдаггүй. Витамин Д нь бидний бие дэх дасан зохицох чадвартай олон мянган ген болон өвчнийг эсэргүүцэх дархлааны үйл ажиллагааг зохицуулдаг. Тиймээс цусан дахь витамин Д-гийн хэмжээ өндөр байвал SARS-CoV-2 халдвар авах магадлал буурахаас гадна халдвар авсан тохиолдолд хүндрэх эрсдэл багасна. Үүнээс гадна витамин Д нь COVID-19 халдварыг эмчлэхэд өндөр үр дүнтэйг олон тооны судалгаа баталжээ. Хүний биед байх ёстой витамин Д-гийн зохистой хэмжээний тухайд хоёр өөр байр суурьтай байна. Тухайлбал, ихэнх Засгийн газрын харьяат байгууллагууд 20 нанограмм/милилитрээс бага  Д витамин хэрэглэх нь хангалтгүй гэсэн бол анагаах ухааны эрдэмтэд болон эрүүл мэндийн нийгэмлэгүүд  30 нанограмм/милилитр  витамин Д ч хангалтгүй хэмээн үзэж байна. Гэхдээ ихэнх хүний Д амин дэмийн хэмжээ дээр дурдсан тунгаас бага түвшинд байгаа юм. Тодруулбал, дэлхийн хүн амын 33 хувь нь 20 нанограмм/милилитрээс бага Д витамин хэрэглэдэг, 50 гаруй хувь нь 30 нанограмм/милилитр  витамин Д хэрэглэдэг буюу энэ төрлийн витамины дутагдалд оржээ. Улирлаар нь авч үзвэл өвлийн улиралд Д витамины дутагдлын хэмжээ улам нэмэгддэг байна. Үүнээс гадна илүүдэл жинтэй, харанхуй орчинд ажилладаг эсвэл асрамжийн газрын гэсэн хэд хэдэн зорилтот бүлгийнхний тухайд Д витамины дутагдал бүр илүү их байдаг аж. Тиймээс энэ бүлгийнхэн COVID-19 халдвар өртөх магадлал нь маш их байна.

Хүмүүсийн 97 хувь нь өдөрт зайлшгүй шаардлагатай 20 нанограмм/милилитр  Д витаминаа авахын тулд 3875 ОУН тун (97mcg), 30 нанограмм/милилитр Д витаминаа авахын тулд 6200 ОУН тун (155mcg) Д витамин буюу үндэсний зөвлөмжнөөс их тунг хэрэглэх ёстой. Харамсалтай нь АНУ-д хийсэн судалгаагаар хүмүүсийн зайлшгүй авах ёстой Д витамины хэрэглээ 10 нанограмм/милилитрээс бага гэсэн дүн гарчээ. 

Гэвч витамин Д бусад эмнээс илүүгээр COVID-19 халдварыг эмчлэхэд хүчтэй нөлөө үзүүлж байгааг баталсан олон тооны судалгаа гарсан энэ үед хэрэглээгээ нэмэгдүүлэх нь зайлшгүй юм. Түүнчлэн COVID-19 халдварт Д витамины дутагдалтай хүн их өртөөд зогсохгүй нас барах нь өндөр байгааг дэлхийн эрдэмтэд нотолсоор байна. Та Д витамины зохистой тунг хэрэглэх нь маск зүүж халдвараас сэргийлэхтэй агаар нэг юм. Тиймээс бид бүх орны Засгийн газар, эмч, эрүүл мэндийн ажилтнуудыг цар тахал алга болтол насанд хүрсэн хүн амынхаа Д витамины хэрэглээг нэмэгдүүлэхэд онцгойлон анхаарч, дараах зөвлөмжийг хэрэгжүүлэхийг уриалж байна. Үүнд:

1. COVID-19-ийн эрсдэлийг бууруулж байгаа нь нотлогдсон тул 30 нанограмм/милилитрээс багагүй Д витаминыг бүх эх үүсвэрээс хангахад анхаарах

2. Насанд хүрэгчид өдөрт 4000 ОУН хамгийн багадаа  2000 ОУН Д витамин хэрэглэх. Илүүдэл жинтэй болон харанхуй орчинд амьдардаг бол хэмжээг нэмэгдүүлнэ.

3. Насанд хүрэгчид 2-3 долоо хоногийн турш 250 мг 10000 ОУН тун витамин Д хэрэглэх ёстой.

4. Халдвар авсан тохиолдолд 25 гидрокси Д3 эсвэл calcifediol хэрэглэх нь зүйтэй.

Эх сурвалж: “Зууны мэдээ” сонин

2021.6.8 МЯГМАР № 115 (6592)