Б.ДАМДИН-ОЧИР
Хоёр мянган оны эхэнд “Мянганы зам” байгуулна гэж зориглон тунхаглахад “Мянгуужингийн үлгэр” гэж нулимж байсан. Энэ бол хориодхон жилийн өмнөх, бүр саяхных ч гэж хэлж болох мартагдаагүй үйл явдал. Тэгвэл монголчууд “Мянганы зам”-аа хорьхон жилийн дотор барьж байгуулаад 21 аймгаа нийслэл Улаанбаатар хоттойгоо засмал замаар холбож чадсан. Өглөө нийслэлээс гараад өдөртөө багтаж Говь-Алтай аймагт хүрчихэж байна. “Мянганы зам” гэдэг чинь “Мянгуужингийн үлгэр” шүү гэж чанга дуугаар шүгэл үлээж шүүмжлэн хашгиралдаж байсан “үгүйсгэгчид” ч өнөөдөр мөн ялгаагүй мянганы замаар салхи татуулан давхилдаж явна. Зам дагаж хөгжил ирдгийг тэд бүгдээрээ нүдээрээ харцгааж, зүрх сэтгэлээрээ мэдрэн үнэмшицгээж эхэлж байна.
Ази, Америк, Европын бүх улс орны туулсан замыг харахад зам бол хөгжил, дэвшил юм гэдэг нь хүн төрөлхтний өнгөрсөн түүхээр нэгэнт батлагджээ. Ялангуяа төмөр замын бүтээн байгуулалтыг бусад улс орнууд ихэд чухалчлан хөгжүүлж ирсэн байх юм. Монголчууд өөрсдөө төмөр зам барьж байгуулж чаддаг гэдгээ өнөөдөр нэгэнтээ батлан харуулсан. Таван толгой-Зүүнбаянгийн 416 км төмөр замаа сая дуусгаад ашиглалтад өгөхөд бэлэн болгочихлоо.
Монголчууд бид мянганы дардан замаа барьж байгуулж чадсан. Одоо “Мянганы төмөр зам”-аа бүтээн босгоцгооё. Ховд-Дорнодыг холбосон хос төмөр замтай болцгооё л доо. Өглөө хотоос гараад өдөржин давхиулаад унтаад сэрэхэд Увс аймаг хүрчихсэн байдаг болбол мөн гоёо.
Үндэсний их бүтээн байгуулалт-“Мянганы төмөр зам”-аа бүтээн байгуулцгаая. Босоо болон хэвтээ төмөр замын нэгдсэн сүлжээтэй болцгооё. “Мянганы төмөр зам” бол “Мянгуужингийн үлгэр” яагаад ч биш шүү. Маргаашийн хөгжлийг ойртуулагч “Мянганы төмөр зам мандтугай!” гэж уриалмаар байна. “Мянганы төмөр зам”-аа байгуулах их бүтээн байгуулалтад ханцуй шамлан орцгооё. Хойш тавьж хэрхэвч болохгүй. Үүнийг хэрэв өнөөдөр хийхгүй юм бол хэзээ хийх юм бэ. Та бид хамтдаа ханцуй шамлан хэрэгжүүлэхгүй юм бол өөр хэн хийх юм бэ? Хүлээж хэрэггүй, хойш тавьж огт болохгүй.
Эх сурвалж: www.polit.mn