Х.ОЮУНБОЛД

БНХАУ-ын ерөнхий сайд Ли Көцян Хятад улс хоёр орны эрх тэгш байдал, харилцан үр өгөөж, стратегийн харилцааг хадгалах, прагматик хамтын ажиллагааг гүнзгийрүүлэх ялангуяа, одоо цар тахлыг хянах болон урьдчилан сэргийлэх  хамтын ажиллагаагаа бэхжүүлэх болон сайн хөршийн харилцаагаа үргэлжлүүлэн хөгжүүлэхэд Монгол Улстай хамтран ажиллахад бэлэн байна гэж мэдэгджээ. Тэрээр энэ мэдэгдлээ ерөнхий сайд Л.Оюун-Эрдэнэтэй утсаар ярих үеэр хийсэн байна. Мөн хоёр орны харилцааг өндрөөр үнэлснээс гадна талууд хоёр орны харилцааг шинэ түвшинд гаргахын тулд цаашид эрчимжүүлэх, томоохон төслүүдийн хамтын ажиллагааны ахиц дэвшлийг хангах, хилийн боомтуудаар дамжиж байгаа ачаа тээвэрлэлтийг сэргээх ажлыг түргэвчлэхийн тулд хүчин чармайлт гаргах ёстой гэв. Түүнээс гадна байгаль орчны асуудлууд хил хязгаар гэж байдаггүй. Тиймээс БНХАУ байгаль орчныг хамгаалах, цөлжилтийн асуудлыг хянах, урьдчилан хамгаалах болон бусад талаар тулгарах бэрхшээлүүдийг шийдвэрлэхэд хамтран ажиллахад бэлэн байгаагаа онцолжээ.

Ли Көцян “БНХАУ-ын эдийн засгийн ерөнхий нөхөн сэргээлтийн үндэс суурь нь тогтмол бэхжиж байна. Мөн Хятадын эдийн засаг дэлхийн эдийн засагт хүчтэй нэгдсэн” гэв. Түүнээс гадна БНХАУ олон улсын эдийн засгийн нөхцөлд гарч байгаа өөрчлөлтүүдэд анхаарлаа хандуулна. Илүү сайн орчинг бий болгохоос гадна зах зээлийн тоглогчдыг идэвхжүүлнэ гэж мэдэгджээ. БНХАУ эдийн засгаа боломжоороо жигд ажиллуулахаас гадна удаан хугацаагаар эрч хүчээ хадгална. Энэ нь хоёр орны хамтран ажиллах боломжийг бий болгохоос гадна талуудад болон ард түмэнд нь үр өгөөжөө өгнө гэв. Харин ерөнхий сайд Л.Оюун-Эрдэнэ “Монгол Улс БНХАУ-тай тогтоосон сайн хөршийн нөхөрсөг харилцаагаа удаан хугацаагаар хөгжүүлэхийг эрмэлзэж байна. Мөн эдийн засгийн хамтын ажиллагаа болон бүс нутгийн экологийн хөгжлийг дэмжинэ” гэв. Цаашид шинэ санаачилга гаргах зорилгоор Монгол Улс БНХАУ-тай хөгжлийн стратегийн хамтын ажиллагааг бэхжүүлэх, хилийн худалдаа, цар тахалтай тэмцэх, хүрээлэн байгаа орчныг хамгаалах, томоохон төслүүдийн хамтын ажиллагаанд ахиц гаргах зэргээр хамтран ажиллахад бэлэн байна гэж ярьжээ. Мөн БНХАУ-ын шинэчлэл, хөгжлийн үндэсний комиссын дарга Хе Лифен тэднийг утсаар ярилцах үеэр байлцсан байна.

Эх сурвалж: www.polit.mn