Б.ДОЛЖИНЖАВ

Мьянмар улсад цэргийнхэн ардчиллын төлөө тэмцэгч иргэдийн эсрэг гал нээсний улмаас долоон хүн нас барж, хэд хэдэн хүн шархадсаныг тус улсын хэвлэл өнөөдөр мэдээллээ. Ингэснээр хоёрдугаар сарын 1-нд цэргийнхэн Засгийн эрхийг гартаа авснаас хойш 580 иргэн амиа алдлаа.

Мөн  Янгон хотод үйл ажиллагаа явуулдаг Хятад эзэнтэй “JOC” оёдлын үйлдвэрт гал гарчээ. Хэдэн хүн гэмтсэн болон ямар хэмжээний  хохирол учирсан талаар одоохондоо мэдээллээгүй байна.  Мөн Хятадын төрийн далбааг шатааж байгаа зургийг идэвхтэнүүд “Facebook”-т постолжээ. Хятад улс цэргийн дэглэмийг дэмжиж байгаа гэсэн хандлагаас болж өнгөрсөн сард гэхэд Янгон дахь Хятадын хөрөнгө оруулалттай 32 үйлдвэрийг шатаасан хэрэг гарсан.

Эмнэлэг, сургууль, үйлдвэрүүд, албан газруудын үйл ажиллагааг зогсоож байгаагаа генерал Мин Аун Хлайнг өнөөдөр зарлалаа. Мөн интернетийн сүлжээг хязгаарлаад байгаа юм. Төрийн эргэлтээс хойш аюулгүй байдлын албаныхан 3500 хүнийг баривчилснаас өнөөдрийн байдлаар 2750 нь хоригдсон хэвээр байна. Үүнд дуучид, жүжигчид гэсэн олны танил хүмүүс багтжээ. Тухайлбал, хамгийн алдартай хошин шогийн жүжигчин Зарганарыг мягмар гарагт баривчилсан байна. Гэсэн ч залуучуудаар удирдуулсан ардчиллын төлөөх иргэд олон кампанит ажлыг зохион байгуулж, олон нийтийн сүлжээ, гар утас, хэвлэмэл материалаар дамжуулан мэдээлэл солилцон тэмцсээр байна.

Эх сурвалж: Reuters