Б.ДОЛЖИНЖАВ

Жил гаруй хугацаанд үргэлжилж байгаа COVID-19 халдварын тархалт хэзээ намжиж, хэвийн амьдралдаа шилжих бол гэдэгт дэлхий нийтээрээ санаа зовниж эхэллээ. Халдвараас урьдчилан сэргийлэх эцсийн итгэл найдвар болсон вакцинжуулалт олон улсад эхэлсэн ч үйлдвэрлэлийн хүчин чадал, хүртээмж нь асуудал дагуулсан хэвээр байна. Тиймээс “Нэг ч орон халдваргүй болсны дараагаар дэлхий нийт халдвараас ангижирна” гэсэн уриалгыг том гүрний удирдагчид санаачлан цар тахлын эсрэг хамтдаа тэмцэхийг санал болгов. Гэвч вакцин халдвараас хэдий хугацаагаар хамгаалах вэ гэдэг нь энгийн иргэд төдийгүй эрүүл мэндийн ажилтнуудын санааг зовоох боллоо.

Тухайлбал, өнгөрсөн сард хийсэн судалгаагаар Pfizer болон Moderna вакцины хоёр тунг хийлгэсэн хүнд хамгийн багадаа зургаан сарын турш 91 хувийн дархлаа тогтоно гэсэн дүн гарчээ. Тэгвэл зургаан сарын дараа тухайн хүний COVID-19 халдвараас хамгаалах дархлаа нь үгүй болох уу гэсэн асуултад шинжээчид хариулт хайж эхлэв. Дээрх хоёр вакциныг мРНХ, РНХ генетикийн технологи ашиглан бүтээснээрээ онцлогтой. мРНХ ашиглан бүтээсэн вакцинуудын эсрэг биетэд үзүүлэх хариу үйлдэл маш өндөр байдаг тул удаан хугацаанд халдвараас хамгаална гэж зарим судлаач үзэж байна.  Учир нь Эбола, Зика вирус, томуугийн эсрэг вакциныг ийм аргаар бүтээж байсан юм. Тиймээс вакцин эсрэг биет үүсгэж, халдвараас хүмүүсийг хамгаалж чадна гэсэн урьдчилсан таамгийг дэвшүүлээд байна.  Түүнчлэн олон сая хүн вакциндаа хамрагдаагүй учир вакцинд хамрагдсан ч тайвширч болохгүйг дархлаа судлаачид анхаарууллаа.

Мөн ДЭМБ-ын шинжээчдийн зөвлөх бүлгийн дарга Алехандро Кравиото Хятадын вакцин үйлдвэрлэгч “Синофарм”, “Синовак” компаниудын бүтээсэн вакцины дүн, аюулгүй байдал ДЭМБ-ын шаардлагад нийцсэн гэж мэдээллээ. Тиймээс дээрх компаниудын бүтээсэн вакцинуудад албан ёсоор зөвшөөрөл олгох асуудлыг энэ сарын сүүлээр дахин хэлэлцэхээр болжээ. Энэ талаар  Алехандро Кравиото “Өнгөрсөн долоо хоногт ДЭМБ-ын шинжээчдийн зөвлөх бүлгийн хурал дээр “Синофарм”, “Синовак” фирмүүд вакциныхаа талаар дэлгэрэнгүй мэдээллийг ил болгосон. Тайлангаас үзэхэд Хятадын вакцинууд 50-70 хувийн үр дүнтэй,  тариулсан хүнд ноцтой гаж нөлөө үзүүлэхгүй байгаа нь нотлогдсон” гэж ярив.

Эх сурвалж: “Зууны мэдээ” сонин

2021.4.6 МЯГМАР № 68 (6545)