Б.ТӨГС

“Зууны мэдээ” сонин “Голомт капитал ҮЦК” ХХК-тай хамтран хөрөнгийн зах зээл болон уул уурхайн салбарт болж буй онцлох сэдвүүдийг тоймлон хүргэдэг билээ.

SAUDI ARAMCO ЖИЛИЙН ТАЙЛАНГАА ЗАРЛАЖЭЭ

Газрын тосны салбарыг тэргүүлэгчдийн нэг болох “Saudi Aramco” компани нь 2019 онд 88.19 тэрбум ам.долларын цэвэр ашигтай ажилласан бол 2020 онд өмнөх оныхоос 44 хувиар бага буюу 49 тэрбум ам.долларын ашигтай ажилласан байна.

Хэдийгээр тус компани өмнөх оныхоос бага ашигтай ажилласан ч тайлант жилд нийтдээ 75 тэрбум ам.долларын ногдол ашиг тараажээ.

Компанийн гүйцэтгэх захирал Amin Nasser хэлэхдээ өнгөрсөн жил “маш том сорилт тохиосон” жил байлаа хэмээсэн байна.

ГАЛЫН УЛМААС  ЯПОНЫ АВТО МАШИН ҮЙЛДВЭРЛЭГЧДИЙН ХУВЬЦАА УНАЛАА

Авто машины чип үйлдвэрлэгч “Renesas” компанийн үйлдвэрт гал гарснаас “Toyota Motor”, “Nissan”, “Honda” Motor зэрэг компанийн хувьцаа энэ долоо хоногт бирж нээгдэх үед уналаа. Тодруулбал, бирж нээгдэх үед компаниудын үнэлгээ 1.4 хувиар унасан бол 12 цагийн байдлаар 3.5 хувиар үргэлжлүүлэн унасан байна.

“Renesas” компанийн үйлдвэрт цахилгааны доголдол үүссэний улмаас усалгааны систем нь гэмтсэн байна. Үүнээс болж үйлдвэрийн 70 хувь нь галд өртөж, нэг сарын хугацаанд ажиллах боломжгүй болжээ.

Мөн усан онгоцны тээвэрлэлт саатаж байгаа нь автомашин үйлдвэрлэгчдийн орлогод саад учруулж байна.

КАНАДЫН НАРНЫ ЦАХИЛГААН ТЕХНОЛОГИЙН КОМПАНИЙН ХУВЬЦАА ӨСЛӨӨ

“Canadian Solar” компани IV улирлын тайлангаа танилцуулсны дараа хувьцааны үнэлгээ нь 11.1 хувь өсчээ. Тус компанийн цахилгааны борлуулалт 13.2 хувь өсч, 1.04 тэрбум ам.долларт хүрсэн байна. Харин материалын үнэлгээ өссөнөөс болж цэвэр ашиг нь 6.7 сая ам.доллар руу буурчээ.

Гэхдээ COVID-ийн үед ч ашигтай ажилласаар байгаа нь хөрөнгө оруулагчдад итгэл төрүүлж байгаа юм.

Өнгөрсөн жилд нарны эрчим хүчний энергийн салбар 43 хувиар өссөн учраас хөрөнгө оруулагчид өндөр өгөөж өгөх салбарын нэг гэж тодорхойлж байна.

Эх сурвалж: “Зууны мэдээ” сонин

2021.3.24 ЛХАГВА № 57 (6534)