Б.ТӨГС

АНУ-ын Холбооны нөөцийн сан өнгөрсөн долоо хоногт хоёр ч удаа хуралдав. Гэхдээ өмнөх хуралдаанаасаа онц гойд өөрчлөгдсөн шийдвэр гаргасангүй. Холбооны нөөцийн сангийн мөнгөний бодлогын шийдвэр дэлхийн эдийн засагт чухал нөлөөтэй байдаг тул тэрчигээрээ чих тавин хүлээдэг юм. Хурлын үеэр онц сонин шийдвэр гараагүй ч дэлхийн эдийн засаг сайжирч байна, сайжрах хандлагатай байна гэсэн үг өгүүлбэр олон удаа давтагджээ. Энэ бол гол мессеж. Хэдийгээр цар тахлын аюул холдох болоогүй ч унасан эдийн засгийг босгож, сэргээж эхэлсний дохио. Эрсдэлтэй үед найдвартай хөрөнгө оруулалтад тооцогддог, аваад авдрандаа нам дарчихдаг алтны ханш ч сүүлийн өдрүүдэд уналтаа хадгалсаар байгаа нь эдийн засаг сэргэж байгааг гэрчилнэ гэж экспертүүд дүгнэж байна. Олон улсын зах зээлээс бүрэн хараат гэж хэлж болох манай уул уурхайн салбарынханд энэ бол таатай мэдээ. Ойрын хоёр гурван жилдээ уул уурхайн салбараас олдог мөнгөндөө санаа зовохгүй байх боломжтой. Гэхдээ 2024 оноос уул уурхайн салбарт уналт эрчимжиж болзошгүй тул анхааралтай байж, бодлогын бусад салбараа хөгжүүлэхийг шинжээчид анхааруулсаар байна.

Дэлхийн зах зээл дээрх жижиг өөрчлөлт манай уул уурхайд хэрхэн нөлөөлж болдгийг сүүлийн үед харсаар байна. Хоёрдугаар сард Монгол Улс Хятадад 1.89 сая тонн нүүрс нийлүүлсэн нь өмнөх сарын дүнгээс 18.4 хувиар буурсан үзүүлэлт юм. БНХАУ хоёрдугаар сарын 11-14-нд Ганцмод болон Сэхэ боомтыг хааж, нүүрсний нийлүүлэлт тасалдсан. Агаарын бохирдолтойгоо идэвхтэй тэмцэж байгаа Хятад улс гангийн үйлдвэрүүдийнхээ хүчин чадлыг 50 хувиар бууруулахаар болсныг зарласны дараа ган үйлдвэрлэгчдийн нүүрсний эрэлт буурч коксын үнийг эрчимтэй буулгасаар байна. Үйлдвэрлэл явагдахгүй бол түлш хэрэггүй гэдэг нь ойлгомжтой. Тухайлбал, угаасан коксжих нүүрсний үнэ цагаан сарын өмнөх үеэс 60 юаниар унасан байна. Энэ нь нүүрсний салбарынханд төвөгтэй байдал үүсгэж байгаа. Жишээлбэл, нүүрсний компаниудын хувьцааны ханш Хонгконгийн бирж дээр тасралтгүй унасаар.  Хамгийн сүүлд “Оюутолгой”-н ажилтнаас Covid-19 илэрсэнтэй холбогдуулан БНХАУ-ын тал Гашуунсухайт-Ганцмод боомтоор нэвтрэх автомашины тоог хязгаарласан. Энэ сарын 17-ноос хойш тус боомтоор өдөрт нүүрс тээврийн 40-50 автомашин нэвтэрч байгаа мэдээлэл байна.  Тус боомтоор оны эхний өдрөөс гуравдугаар сарын 15-ныг хүртэл өдөрт дунджаар 500 орчим автомашин урд хөрш рүү нүүрс тээвэрлэж байсан билээ. Урд хөршөөс зөвхөн шинжилгээ хийлгэсэн жолооч нарыг нэвтрүүлэх шаардлага тавьж байсан бол удахгүй вакциндаа хамрагдсан жолоочийг л нэвтрүүлэх шийдвэр гаргах магадлалтай байна.

Хэдийгээр дэлхийн эдийн засаг сэргэсэн ч үндсэндээ ганцхан улсаас ганцхан боомтын үйл ажиллагаанаас бүрэн хамааралтай, манай уул уурхайн салбар хэдийд ч бүдэрч мэдрэхээр цаг үе биднийг угтана. Эдийн засгийн сэргэлтэд найдаж болохгүйн шалтгаан ердөө л энэ.

Эх сурвалж: “Зууны мэдээ” сонин

2021.3.24 ЛХАГВА № 57 (6534)