Б.ДОЛЖИНЖАВ

COVID-19 халдварын тархалтыг хумихын тулд Япон улс зарим мужууддаа гуравдугаар сарын 7-ныг хүртэл хөл хорио тогтоогоод байсан билээ. Тэгвэл зарим мужид тархалт буурсан тул хөл хориог хугацаанаас нь өмнө сулруулахыг хотын эрх баригчид Засгийн газартаа уриаллаа.

Халдварын улмаас өнгөрсөн сард 11 мужид онц байдал зарлаж, бизнесийн байгууллагуудын ажиллах цагийг багасгаад байсан юм.Энэ тухай Засгийн газрын хэрэг эрхлэх газрын дарга Като Кацунобу “Онц байдлын зэргийг энэ долоо хоногоос үе шаттайгаар бууруулна. Гэхдээ бизнесийн байгууллагуудын цагийг богисносгох журам хэвээр байж магадгүй. Токио болон хөрш зэргэлдээ хотуудад онц байдлын дэглэм хэвээр үргэлжилнэ” гэж өнөөдөр мэдэгдлээ.

Ерөнхий сайд Сүга Ёшихидэ зургаан хотын эрх баригчидтай уулзаж, хөл хориог бууруулах талаар хэлэлцжээ. Тэрээр эцсийн шийдвэрийг баасан гаригт танилцуулна гэж Засгийн газрын эх сурвалж мэдээлэв.

Япон улсад мягмар гаригт 1083 халдвар бүртгэгдсэн бол Токио хотод өнөөдөр 213 хүнээс халдвар илэрсэн нь арваннэгдүгээр сараас хойших хамгийн бага үзүүлэлт юм. Нэгдүгээр сарын 8-нд халдвар оргилдоо хүрч, нэг өдөр 8000 орчим халдвар бүртгэгдэж байв. Халдварын гуравдугаар давалгаанд хамгийн ихээр өртсөн Япон улс цар тахлын эсрэг дархлаажуулалтыг өнгөрсөн долоо хоногт эхлүүлээд байна.

Эх сурвалж:Reuters