Б.ДОЛЖИНЖАВ

Ерөнхий боловсролын сургуулийн танхимын хичээлийг гуравдугаар сарын 1-нээс эхлүүлэх талаар БШУ-ны сайд Л.Энх-Амгалан байр сууриа илэрхийллээ. 

 Тэрээр “ЕБС-ийн танхимын хичээлийг гуравдугаар сарын 1-нээс эхлүүлье гэж бодож байна.Энэ нь хэд хэдэн шалтгаантай. Нэгдүгээрт, цаг агаар хүйтрэх төлөвтэй байгаа. Отроор явж байгаа малчдын 20 мянга орчим хүүхэд бий. Хоёрдугаарт, томуу, томуу төст өвчний оргил үе нь  энэ сард тохиож байна. Гуравдугаарт, сар шинийн баярын үеэр хөл хорио тогтоох урьдчилсан мэдээлэл байна. Тиймээс бэлтгэлээ сайн хангаж байгаад гуравдугаар сарын 1-нээс анги, танхимаар хичээллэх зайлшгүй шаардлагатай. Сурагчид нэг хичээлийн жилд 165-180 хоног хичээллэх ёстой. Гэтэл өнгөрсөн онд 80 гаруй хоног цахим, теле хичээл үзсэнээс болоод сурагчдын 70-80 хувь нь хоцрогдолд орсон байна. Мөн  174 мянган хүүхэд гар утас, компьютергүй, интернэтийн сүлжээгүй газарт байгаа нь миний санааг зовоож байна.  Улаанбаатар хотод гэхэд гэр нь цахилгаанд холбогдоогүй 30 мянган өрх байна гэдэг судалгаа бий. Тэдгээр өрхийн хүүхдүүдэд анхаарлаа хандуулъя гэж бодож байгаа.Нийслэлд хичээл эхлүүлэх асуудлаар хотын захирагчтай энэ баасан гаригт уулзаж, тодорхой шийдлүүд гаргана” гэлээ.

 Эх сурвалж:www.polit.mn