Ч.ЗОТОЛ

Орон нутгийн сонгууль өнгөрсөн ч ИТХ-аа хуралдуулж чадахгүй,  Засаг даргаа томилоогүй, томилсон ч хууль зөрчсөн аймаг, сум олон байна. Тэдний нэг нь  Дундговь аймгийн  Өлзийт сум юм. Тус сумын  ИТХ-ын сонгуульд АН, МАН-ын суудлын харьцаа тун ойрхон зөрж, ингэхдээ МАН илүүрхжээ. Шинээр бүрдсэн ИТХ хуралдаанаа хийхийн өмнөх шөнө Дундговь аймгийн МАН-ын гурван тэргүүлэгч очиж шөнөжин эргүүлд гарснаар  МАН-ын гишүүн  Б.Гасрандорж сумын Засаг дарга болсон байна. Түүний хувьд өнгөрөгч сонгуульд аймгийнхаа ИТХ-д нэр дэвшсэн ч сонгогдоогүй. Шинэ томилгоотой холбоотой  АТГ-ын хяналтаар  “Төрийн албанд гурван  жил ажилласан байх  хуулийн шаардлага хангаагүй. Иймд хуулийн шаардлага хангасан хүнийг нэр дэвшүүлэн томилно уу гэсэн хариу ирүүлжээ.

 АТГ-ын дүгнэлт  өнгөрсөн сарын 17-нд хэзээ мөдгүй  бүрэн эрхээ шилжүүлэх гэж байсан аймгийн Засаг дарга О.Бат-Эрдэнэд ирсэн боловч "Буцах бэрд үхэр тугал нийлэх хамаагүй" гэгчийн үлгэрээр тэрхүү бичгийг үл тоон Б.Гасрандоржийг томилжээ. Ийнхүү яаран томилсон нь ашиг сонирхолын зөрчилтэй гэсэн хардлагыг  олон нийтэд төрүүлж байна.

Түүнчлэн өнгөрсөн сарын 3-нд хуралдсан тус  аймгийн ИТХ-ын Анхдугаар хуралдаанаас нэр дэвшсэн Ц.Мөнхбатыг Монгол улсын Ерөнхий сайд У.Хүрэлсүх Аймгийн Засаг даргаар батламжлахгүй энэ  сарын-1 хүртэл хүлээсэн нь ч дээрх хууль зөрчсөн томилгоог зөвшөөрөх, эсэхээр барьцаалсан тухай мэдээлэл байна. Дундговь аймгийн Засаг даргаар томилогдсон Ц.Мөнхбат өмнөх Засаг даргын хууль бус томилгоог буцаах уу, эвлэрэх үү, энэ томилгоонд яаж хандах нь шударга ажиллах эсэхийн эхний шалгуур гэж олон нийт ажиглаж бас хүлээж  байна.

Эх сурвалж: www.polit.mn