Т.БАТСАЙХАН

Засгийн газрын бүтэц, бүрэлдэхүүний талаар өнгөрсөн хугацаанд хангалттай ярьж, сайд нарын хэн нь хэн бэ гэдгийг “шүүсэн”.  Энэ удаа яамдын бүтцийн талаар цувралаар хүргэж байна.  Өмнө нь Гадаад харилцааны яамны газрын захирлуудыг танилцуулсан бол энэ удаа Барилга, хот байгуулалтын яамны газрын дарга нарыг танилцуулж байна. Тус яамыг  өмнөх Засгийн газрын үед УИХ-ын гишүүн Х.Баделхан удирдаж байв. Харин одоо дэд сайдаар нь ажиллаж байсан Б.Мөнхбаатар салбарын сайдын ажлыг авсан  билээ. Тус яам есөн газартай. Барилга хөгжлийн төв гэсэн бие даасан нэг агентлагтай, 21 аймагт салбартай, сумдад газрын даамлууд ажилладаг.  Мөн сайдын дэргэд, сайдын зөвлөл, шинжлэх ухаан, технологийн зөвлөл ажилладаг. “Төрийн орон сууцны корпораци” тус яамны бие даасан агентлаг болж үйл ажиллагаа явуулж байсан бол саяхан  татан буугдсан билээ.  Б.Мөнхбаатар сайдын хувьд ажлаа авсаныхаа дараа ямар нэгэн халаа сэлгээ хийгээгүй гэдгийг хэвлэлийн албанаас нь мэдээлсэн. Газрын дарга нар нь бүгд Х.Баделхан болон түүний өмнөх сайдын үед томилогдсон хүмүүс юм байна.  Ийнхүү БХБЯ-ны газрын дарга нарын мэдээллийг хүргэж байна.

Барилга, хот байгуулалтын сайд Б.Мөнхбаатар.  Тэрээр Засгийн газрын өмнөх бүрэлдэхүүнд багтаж,  БХБ-ын  дэд сайдаар ажиллаж байсан.  Түүний өмнө буюу Ж.Эрдэнэбатын Засгийн газрын үед “Оюутолгой” ХХК-ийн ТУЗ-ийн гишүүн, “Эрдэнэс Оюутолгой” компанийн гүйцэтгэх захирлаар томилогдон ажиллаж байсан. Мөн 2014-2015 онд Ч.Сайханбилэгийн хамтарсан Засгийн газарт  Хүн амын хөгжил, нийгмийн хамгааллын дэд сайдаар томилогдон ажилласан байдаг.

Барилга, хот байгуулалтын дэд сайд Э.Золбоо. Тэрээр  2014-2016 онд МАН-ын Ерөнхий нарийн бичгийн даргын зөвлөх, 2015-2018 он хүртэл НАМЗХ-ны дэд ерөнхийлөгч, Ерөнхий нарийн бичгийн дарга, 2018 оноос Ерөнхий сайдын зөвлөхөөр ажиллаж байгаад Барилга, хот байгуулалтын дэд сайдаар томилогджээ.

Төрийн нарийн бичгийн дарга С.Магнайсүрэн.  Өмнөх Засгийн газрын үед ч тус яаманд ТНБД-аар ажиллаж байв. Түүнээс өмнө УИХ-ын Тамгын газрын даргын нарийн бичгийн даргаар ажиллаж байсан  билээ.

Газар зохион байгуулалт, геодизи, зураг зүйн газрын дарга Ц.Ганхүү.   Тэрээр 2016 онд энэ албан тушаалд томилогдсон байдаг.

Бодлого, төлөвлөл­тийн газрын дарга Ц.Баяр­бат.  Мөн тус яаманд мэргэ­жилтнээс эхлээд олон жил ажиллаж байна.

“Барилгын хөгжлийн төв” ТӨҮГ-ын захирал Ц.Амарсанаа. Тэрээр өмнөх Засгийн газрын үед  томилогдсон байдаг.

Төрийн захиргааны удирдлагын газрын дарга Д.Баярсайхан.  Мөн өмнөх сайдын үед энэ албан тушаалд томилогдож байв.

Хяналт-шинжилгээ, үнэлгээ, дотоод аудитын газрын дарга Н.Нарантуяа. Засгийн газрын 2018 оны 22 дугаар тогтоолоор “Чиг үүрэг дахин хуваарилах аргачлал”-ыг баталснаар төрийн чиг үүргийн шинжилгээг шинжлэх ухааны үндэслэлтэй, практикт нийцсэн байдлаар хийх боломж бүрэлдсэн. Тус газар нь энэ аргачлалын дагуу салбарынхаа хүрээнд чиг үүргийн шинжилгээ хийж, дахин хуваарилах саналыг боловсруулсан байдаг.

Нийтийн аж ахуйн бодлогын хэрэгжилтийг зохицуулах газрын дарга О.Лхагвацэдэн. Тэрээр тус газрын даргаар  өмнөх Засгийн газрын үед ажиллаж байсан.  Өнгөрсөн хугацаанд цэвэрлэх байгууламжтай холбоотой ажлыг нэлээд явуулсан гэхэд болно.

Инженерийн дэд бүтцийн бодлогын хэрэгжилтийг  зохицуулах газрын дарга   Б.Мөнхбаатар.  Мөн тус газрын даргаар 2-3 сайдын үед ажиллаж байна.

Барилга, барилгын материал, үйлдвэрлэлийн бодлогын хэрэгжилтийг зохицуулах газрын дарга Б.Гантулга. Тэрээр өмнө нь Барилга хөгжлийн төвд хэлстийн даргаар ажиллаж байв.  

Хот байгуулалт, газрын харилцааны бодлогын хэрэгжилтийг зохицуулах газрын дарга  Л.Гүнболд. Тэрээр хот төлөвлөлтийн чиглэлээр мэргэшсэн. Улаанбаатар хотын төвлөрлийг сааруулахын тулд дэд төв, дагуул хотууд байгуулж, бусад хот суурин газрыг хөгжүүлэх шаардлагатай гэсэн байр суурьтай байдаг нэгэн.

Сайдын зөвлөл Л.Батжаргал.  Тэрээр өмнө нь тус яамны Бодлого, төлөвлөлтийн газрын даргаар ажиллаж байв.

Эх сурвалж: “Зууны мэдээ” сонин

2020.9.30 ЛХАГВА № 189 (6414)