С.САРУУЛ

Ерөнхий сайд У.Хүрэлсүх Засгийн газрын бүтцээ УИХ-д танилцуулж гишүүдийн байр суурийг сонслоо. Соёлыг нэмэхээс өөрөөр өмнөх Засгийн газрын бүтцэд өөрчлөлт ороогүй. Эдийн засаг хүндрэлтэй байгаа учраас хэвээр хадгална гэдгээ Ерөнхий сайд онцлов. Энэ үеэр УИХ-ын гишүүн Ж.Ганбаатар “Эдийн засгийн байнгын хорооны даргаар ажиллаж байхад эдийн засгийн асуудал эрхэлсэн сайд олдоггүй. Сангийн сайд, ЗГХЭГ, УУХҮЯ нь өөрөөсөө түлхдэг, хариуцах эзэнгүй болчихдог. ЗГХЭГ эдийн засгийн хөгжлийн асуудлыг аваад явахад цаг зав нь ч гарахгүй болов уу. Өнөөдөр эдийн засгийн асуудал Монгол Улсад хамгийн эхэнд тавигдаж байна. Сангийн сайдынх нь ч зав гарахгүй. Мөн ЖДҮ-ийн тухай хуулиар агентлагтай байх ёстой. Ямар хууль нь хэрэгжээд байдаг юм бэ. 800 мянган хүн ажилладаг салбар шүү дээ” гэлээ.

 УИХ-ын гишүүн С.Бямбацогт “Соёлын яамыг байгуулж байгаа бол тусад нь Соёл урлагийн газар байх хэрэггүй. Өмнө нь Соёлын яамгүй байхад Соёл урлагийн газар байсан. Соёлын сайдын эрхлэх гуравхан асуудал бий. Энэ гурван асуудлыг Соёлын яам дангаараа хариуцах боломжтой.Давхар Соёл урлагийн газар байгуулж, хоорондоо ажлаа булаацалддаг илүү зардал гаргах шаардлагагүй” гэлээ.

Эх сурвалж: www.polit.mn