Т.САЙХАН
Нийслэлд үйл ажиллагаа явуулдаг зарим аж ахуйн нэгжийн үйл ажиллагааг нээх тухай захирамжийг Хотын дарга С.Амарсайхан гаргасан билээ. Энэ талаар НЗДТГ-ын Хууль, эрх зүйн хэлтсийн дарга А.Даваажаргалаас тодрууллаа.
-Үйлчилгээний зарим газрыг нээхээр шийдвэрлэснийг олон нийт янз бүрээр хүлээн авч байна. Энэ талаар бодит мэдээлэл хүргэхгүй юу?
-Цар тахлаас урьдчилан сэргийлэх бэлэн байдлыг хангах хүрээнд Улсын Онцгой комисс өндөржүүлсэн бэлэн байдлын хугацааг тавдугаар сарын 31-нийг хүртэл сунгасан. Гэсэн ч улс орны эдийн засаг, нийслэлийн төсвийн хүндрэлтэй асуудал шил, шилээ даран үүсч байна. Тийм учраас бизнесийн зарим үйл ажиллагааг нээх нь зүйтэй гэж үзсэн. Халдварын тохиолдлууд бүгд гадны улсаас зөөвөрлөгдөн орж ирж, дотооддоо өвчний тархалт илрээгүй байна. Тиймээс Хотын дарга захирамж гаргасан.
-Захирамжийн үйлчлэлийн хүрээнд ямар байгууллагууд нээгдэх вэ?
- Үйл ажиллагаа явуулж байгаа спорт заал, бассейн, бүжгийн клуб, сургалтын төвийн танхимын сургалтаас бусад сургалтын үйл ажиллагааг нээсэн. Засгийн газраас салбарын сайдад үүрэг өгсний дагуу танхимын сургалтын төвүүдийн үйл ажиллагааг БСШУСЯ-наас зогсоосон юм. Нийслэлийн Засаг даргын зүгээс Засгийн газрын гишүүний зогсоосон байгууллагын үйл ажиллагааг нээх хууль эрх зүйн боломжгүй учраас танхимын бус сургалтууд буюу фитнесс клуб, иог, танхимд хичээллэдэг сургалтын байгууллагын үйл ажиллагааг нээсэн. Мөн олон талын шалтгааныг харгалзан үзэж ресторан, баар, караоке, дэлгүүр, үйлчилгээний байгууллагын үйл ажиллагаа явуулах цагийн хуваарийг 07:00-00:00 цагийн хооронд байхаар зохицуулсан. Мөн сүм хийдийн үйл ажиллагааг зөвхөн дотооддоо үйл ажиллагаа явуулахаар болгож, сүсэгтэн олныг цуглуулахгүй байхаар зохицуулаад байна.
Эх сурвалж: www.polit.mn