Т.САЙХАН

 Хуулийн дагуу дөрөвдүгээр сарын 25-аас өмнө аливаа нам, эвсэл сонгуульд оролцох эсэхээ СЕХ-нд албан ёсоор мэдүүлэх учиртай. Тэгвэл өнөөдөр /04.24/ өглөө 10.00 цагт  “Та бидний эвсэл” –ээс сонгууль оролцох хүсэлтээ хүргүүллээ. Нийслэлийн МАХН-ын дарга Э.Эрдэнэжамьяан, МАХН-ын гүйцэтгэх товчооны гишүүн, доктор Л.Мөнхсайхан нар 2020 оны УИХ-ын сонгуульд эвсэл оролцоно гэдгээ мэдэгдэж, холбогдох баримт бичгээ СЕХ-ны удирдлагуудад гардуулав.

Түүнчлэн  МАХН-ын дарга, Монгол Улсын гурав дахь Ерөнхийлөгч Н.Энхбаяр, ИЗНН-ын дарга Ц.Ганхуяг,  МУНН-ын дарга Б.Батболд,  МАХН-ын Ерөнхий нарийн бичгийн дарга Б.Тулга тэргүүтэй хүмүүс ирсэн байв.   

МАХН-ын дарга Н.Энхбаяр: Хуулийн дээгүүр алхагчдаас салах сонголтыг хийнэ

 -Бид өнөөдөр том алхам хийх гэж байна. МАН 2020 оны сонгуулиар хөл хорио тогтоож байгаад ард түмэнтэй уулзуулахгүй,  сонгуульд ялна гэж бодож байна. Харин ард түмэн өөр бодолтой байна. Бид хүчирхийлэгчдээс, 60 тэрбумчдаас, ЖДҮ-чдээс, оффшорчдоос, “Эрдэнэт”-ийг зарсан хүмүүсээс, Тавантолгой, Оюутолгойг худалдсан улс гээд хуулийг дээгүүр алхагчдаас салах сонголтыг энэ сонгуулиар хийнэ.  Бид эвсэлээ   "Та бидний эвсэл" гэж нэрлэсэн.  Иргэдтэй уулзаж явахад та нар бидний найдвар шүү гэж байсан. Тиймээс эвсэл ийм нэрээр 2020 оны сонгуульд оролцоно. Мөн  бид  нийгмийн даатгалын шимтгэлээ төлдөг хүн бүрийг орон сууцтай болгоно гэж амласан. Байгалийн баялгийг нь ард түмэнд авч өгнө гэж хэлсэн. Мөрийн хөтөлбөртөө энэ бүхнийг багтаасан. Монголчууд хэдий  болтол ядуу хэвээрээ байх юм. Хоёрдугаарт, хөрөнгө оруулалтын бодлого өөрчлөгдөнө. Хөшөө барихгүй ээ, өөрсдийгөө сурталчилсан үйл ажиллагаа явуулахгүй. Цэвэр үйлдвэрийн хөрөнгө оруулалт хийнэ. Ажлын байрыг бий болгоно. Зээлийн хүүг бууруулна.  Энэ бол хоёр, гурван намын мөрийн хөтөлбөр биш нийт ард түмний мөрийн хөтөлбөр юм.  Үүнийг хэрэгжүүлэхийн төлөө явна. Монголын байгалийн баялаг дээр хөндлөн суусан хүмүүс өөрсдөө хүн хөнөөчихөөд, байгалийн баялаг худалдчихаад, хууль бус тендер авчихаад, албан тушаал эрх мэдэл наймаалцчихаад сонгуульд оролцож болж байна.  Харин намайг хэлмэгдүүлж шүүхээр ялалчихаад шүүхийн ялтай гэдгээр сонгуульд оролцуулахгүй боодог хууль санаачилсан. Хүнийг бүх насаар нь сонгох сонгогдох эрхийг хааж болохгүй гэсэн дүгнэлтээ цэц баталгаажуулах ёстой.

Нийслэлийн МАХН-ын дарга Э.Эрдэнэжамъяан: Ирэх сарын 10-нд нэр дэвшигчид тодорно

  -Сонгуулийн ерөнхий хороонд эвслийг төлөөлж хүсэлтээ хүлээлгэж өглөө. Хуульд нам, эвслийн сонгуульд оролцох баримт бичгийн бүрдлийг шаарддаг. Нийт 78 хуудас материалыг хуулийн дагуу бүрэн хүлээлгэж өгсөн. Мөрийн хөтөлбөр болон бусад мэдээлэл бүхий материалууд хуульд нийцсэн. Бидний мөрийн хөтөлбөрт тусгасан олон зүйлийг өөрчлөхийг Үндэсний аудитын газар шаардсан. Бид ч тэдгээр заалтынхаа утгыг нь алдагдуулахгүйгээр өөрчилж өгсөн. Эвслийн гэрээ байгуулахаасаа өмнө намуудад нэр дэвшилтийн ажиллагаа явагдсан. Одоо тавдугаар сарын 10-ны өдөр нэр дэвшигч нар тодорхой болно гэлээ.

Эх сурвалж:www.polit.mn