Монголбанкны дэд ерөнхийлөгч асан Э.Батшугар
Өнгөрсөн долоо хоногт ОУВС хуралдаж, “Ковид-19” цар тахалаас үйдэлтэй эдийн засгийн хямралыг “Их хорио”-ны хямрал гэж нэрлэжээ. Улмаар дэлхийн эдийн засгийг гурван хувиар агшина гэсэн таамаг гаргалаа. БНХАУ-ын хувьд эдийн засаг нь цар тахалын улмаас 1976 оноос хойш анх удаа агшилтад орж, 2020 оны нэгдүгээр улиралд гэхэд 6.8 хувиар буурсан байна.
Монгол Улсын эдийн засаг ч “Ковид-19” цар тахалын үед амаргүй нөхцөл байдалтай тулж мэднэ. Одоогоор манай Засгийн газраас эдийн засгаа дэмжих зорилгоор 5.1 их наяд төгрөгийн бодлогын арга хэмжээ баталж, хариу үйлдэл хийж эхэллээ. Гэвч энэ нь эдийн засагт бодит дэмжлэг, вакцин болж очиж, чадахгүй байна.
Тэгвэл эдийн засгийн амаргүй нөхцөл байдал, мөчлөг үүсэх эрсдэлтэй энэ үед хэрэгжүүлэх үр дүнтэй арга хэмжээ нь юу байх вэ?
- Хөнгөлөлттэй урт хугацааны зээлийг ААН-үүдэд олгох. Ингэхдээ зээл авахад нь ажлын байрны цомхотгол хийхгүй байхыг сануулах.
- Мөн “Ковид-19” цар тахалын хориг арга хэмжээний улмаас орлого нь тасалдсан хувиараа бизнес эрхлэгч иргэдэд тухайн хугацааны орлоготой нь тэнцэхүйц хэмжээний урт хугацааны, хөнгөлөлттэй зээл олгох.
- “Ковид-19” цар тахалын нөлөөнөөс болж ажилгүй болсон иргэдэд ажилгүйдлийн тэтгэмж олгох.
Засгийн газар энэ арга хэмжээнүүдэд зарцуулах санхүүжилтийг Улсын төсвөөс гаргах хэрэгтэй. Нэн яаралтай биш, шаардлагагүй зардлуудаа танаж, цар тахалын үед эдийн засгаа эрчимжүүлэх нь чухал байна.
Төвбанкны зүгээс бодлогын хүүгээ буулгаж, хариу арга хэмжээ авч байна. Гэхдээ энэ арга хэмжээний бодит нөлөө 4-6 сарын дараа Монголын эдийн засагт мэдрэгдэнэ. Харин “Ковид-19” цар тахалаас үүдэлтэй эдийн засгийн уналт бидний хүлээхгүй тул Төвбанк уламжлалт бус бодлогын арга хэмжээг шуурхай авч хэрэгжүүлэх хэрэгтэй.
Үүнд, “Ковид-19” цар тахалаас үүдэлтэй иргэд , ААН-ын муудсан зээлийг худалдан авч зээлийн бүтцийн өөрчлөлт хийх.
а.Зээлийн эргэн төлөлтөд тодорхой хугацаанд чөлөө олгох
b.Зээлийн хүүг багасгах
Дээрх эдийн засгийн арга хэмжээнүүдийг авч хэрэгжүүлснээр иргэд, ААН-ийг зээлийн дарамтнаас хамгаалахаас гадна нийт санхүүгийн системийн тогтвортой байдлыг хадгална.
Эх сурвалж: www.polit.mn