Ч.ЗОТОЛ Улс төрийн нам, эвслүүд 2020 оны сонгуульд оролцох  мөрийн хөтөлбөрөө Үндэсний аудитын газарт өглөө. АН-ын мөрийн хөтөлбөрийг УИХ-ын гишүүн, АН-ын дэд дарга  З.Нарантуяа, Ерөнхий сайд асан, АН-ын дэд дарга Р.Амаржаргал тэргүүтэй ҮБХ-ны гишүүд нь  ҮАГ-ын даргад гардуулан өгсөн юм.  УИХ-ын гишүүн, Ардчилсан намын дэд дарга З.Нарантуяа хэлэхдээ  “Ардчилсан намын мөрийн хөтөлбөр нь  “Монгол өрх хөгжлийн бодлого” нэртэй. Манай намын мөрийн хөтөлбөрийн гол чиглэл нь  монгол айл өрх бүрийн амьдралын чанарт эрс өөрчлөлт гаргаж, эдийн засгийн  өсөлтийг авч ирэх хөгжлийн хөтөлбөр гэж тодорхойлж байгаа. Бид бүтээдэг, сэтгэдэг, хийдэг хэсгээ дэмжинэ. Монголын төр байгалийн баялгаа түүхийгээр нь экспортолдог биш үйлдвэрлэдэг орон болохын төлөө хөгжлийн загвараа тодорхойлсон. Эдийн засгийн өсөлт, тэлэлтэд  хамгийн том хувь нэмэр  оруулдаг баялаг бүтээгчид буюу жижиг дунд үйлдвэрлэлээ түлхүү дэмжинэ. Монгол өрх болгоныг дэлхийн дундаж орлоготой болгоно.  Ингэснээр иргэдийн цалингийн доод түвшнийг гурван  сая төгрөгт хүргэнэ. Иргэдийг үнэгүй орон сууцаар хангахыг урьтал болгохгүйгээр  хөдөлмөрийн үр шимээр хамгийн тохилог орон сууцыг худалдан авах орлогыг бий болгохыг зорьсон” гэв. “БИД ЦАХИМААР ХУРАЛДАЖ, МӨРИЙН ХӨТӨЛБӨРӨӨ БАТАЛСАН” Ерөнхий сайд асан, Ардчилсан намын дэд дарга Р.Амаржаргал “ Мөрийн хөтөлбөрийг хуулийн дагуу тав хоногийн дотор аудитын байгууллага хуульд нийцсэн эсэхийг үзээд  шаардлага хангасан эсэхийг мэдэгдэнэ. Тэр бүхний дараагаар бид намынхаа мөрийн хөтөлбөр дотор  хөгжлийн ямар бодлого багтсан талаар дэлгэрэнгүй ярьж болно. Түүнээс өмнө задалж ярих шаардлагагүй гэж бодож байна. Бид хөгжлийн бодлогынхоо төвд өрх гэрийг тавьж байгаа. Бид  Үндсэн хууль болон холбогдох хууль тогтоомж, хөгжлийн үзэл баримтлалд нийцүүлэн намынхаа мөрийн хөтөлбөрөө боловсруулж, гардуулж байна. Манай намын Үндэсний бодлогын хорооноос хоёр удаа цахим хурал хийж, нийт 90 гаруй хувийн ирцтэйгээр оролцож, мөрийн хөтөлбөрөө баталсан” гэлээ. Эх сурвалж: www.polit.mn