Т.БАТСАЙХАН Өргөдлийн байнгын хороо өчигдөр намрын ээлжит  чуулганы үеэр хийж хэрэгжүүлсэн ажлаа танилцуулав.  Энэ хугацаанд иргэдээс 164 өргөдөл, гомдол хүлээн авч шийдвэрлэжээ. Өргөдлийн байнгын хорооны дарга, УИХ-ын гишүүн М.Оюунчимэг “Бид агаарын бохирдлыг бууруулах чиглэлээр түүхий нүүрсний хэрэглээг зогсоох, хийн хэрэглээг нэвтрүүлж, сайжруулсан түлшний үйлдвэр байгуулах чиглэлийг Засгийн газарт өгч ажилласан. 2018 онд агаа­рын бохирдлыг бууруулахаар Улсын төсөвт 19 тэрбум төгрөг тусгасан байдаг. Нийслэлийн 1298 сур­гууль, цэцэрлэг, эмнэл­гийг 657 гаруй сая төг­рө­гийн агаар шүүгчээр бү­рэн хангасан. Нийслэлийн хэм­жээнд 68 уурын зуух буулгаж, нүүрсээр галладаг төрийн байгуулагуудыг төвийн шугамд холбох ажлыг эрчимжүүлсэн. Түүхий нүүрсний хэрэглээг хориглох шийдвэр гаргасан. Энэ хүрээнд хотын агаарын бохирдол 50-55 хувь,  агаарын нарийн ширхэгт тоосонцрын хэмжээ 38-42 хувиар буурсан үзүүлэлттэй гарсан байна.  Мөн 2018 онд “Цэвэр агаар сан”-д анх удаа аудит хийлгэж, сүүлийн арав гаруй жилд агаарын бохирдлыг бууруулах чиглэлээр ямар үр дүнтэй ажилласныг дүгнэлээ” гэв.  Мөн сүүлийн арван жилд 750 тэрбум төгрөгийг агаарын бохирдол бууруулахад үр дүнгүй зарцуулж байсан бол сүүлийн нэг жилийн хугацаанд 75 тэрбум төгрөг зарцуулж, агаарын бохирдол буурсан бодит үр дүнтэй ажил­ласан гэдгийг тодотгож байв. Түүнчлэн байнгын хорооны хийсэн ажлаа дурдвал -Туул голыг хамгаалах чиглэлээр ажиллаж, хууль тог­тоомж зөрчиж, Туул го­лын эрэг дагуу үйл ажил­лагаа явуулж байсан 56 иргэд, аж ахуй нэгжийн тус­гай зөвшөөрлийг цуцалсан. -“Буянт-Ухаа-2” хороол­лын гацаад байсан 500 тэрбумын хөрөнгийг Хөгжлийн банкнаас олгуулахаар шийдүүлсэн. -ТОСК журамдаа ахмад настан, залуу гэр бүл, хөгжлийн бэрхшээлтэй иргэдийг хамгийн эхэнд хамруулах, түрээсэлж байх хугацаандаа ипотекийн зээлд хамрагдаж, өөрийн эзэмшилдээ шилжүүлж авах боломжийг олгох зэрэг өөрчлөлтийг оруулсан. -Ипотекийн зээлийн журамд гэр хорооллын иргэд инженерийн дэд бүтэцтэй, эрчим хүчний хэмнэлттэй, нийт талбай нь 120 мкв-аас ихгүй амины орон сууц барихад 60 сая хүртэлх төгрөгийн зээл олгохоор тусгуулсан. -“Эрдэнэс тавантолгой” компанийн ногдол ашгийг иргэдэд хуваарилах асуудлаар 25 мянга гаруй иргэдээс ирүүлсэн өргөдлийн дагуу Уул уурхай, хүнд үйлдвэрийн сайдын мэдээллийг Байнгын хорооны хуралдаанаар сонссон. Улмаар гишүүдээс гарсан саналыг нэгтгэж байнгын хорооны хурлын тэмдэглэлээр “Эрдэнэс тавантолгой” ХК-ийн нийт хувьцаа эзэмшигч иргэдэд 2019 оны цэвэр ашгаас ногдол ашиг хуваарилах асуудлыг судалж шийдвэрлэх, хувьцаа эзэмшигчдийн бүртгэлийн ажлыг эрчимжүүлэхийг чиглэл болгосон гэлээ. Эх сурвалж: “Зууны мэдээ” сонин 2020.2.7  БААСАН  № 26 (6251)