Ч.ЗОТОЛ Сонгуулийн тухай хуулийг эрх баригч нам дур зоргоороо өөрчилж, дарангуйлал хийж байна үзсэн  улс төрийн намууд эсэргүүцэл илэрхийлсээр байна. Тэдний байр суурийг хүргэе.   С.Батбаатар/ИЗНН-ын Ерөнхий нарийн бичгийн дарга/: Сонгуулийн хууль намуудын ч, иргэдийн ч эрхийг зөрчихөөр байна  -Сонгуулийн хууль нь  улс төрийн намуудаас гадна иргэдийн сонгох эрхийг ноцтой зөрчиж байна. Сонгуулийн хуулийн 106.1-т  тухайн хэсэгт нийт сонгогчдын 50 буюу түүнээс дээш хувь нь санал өгснөөр хүчинтэйд тооцогдно гэж бий.  Гэтэл одоогийн хуулиар 3000 сонгогчтой хэсэгт 100 хүн санал өгсөн ч хүчин төгөлдөр  байхаар  болсон. Энэ бол ард түмний дөрвөн жилд нэг удаа сонгох эрхийг булааж авсан луйвар. Улс төрийн намууд энэ байдлыг эргэж харахыг шаардаж байгаа. Энэ бол намын гишүүнээрээ уралдъя гэсэн үг. Тэгвэл эд нарт итгэл алдарсан ард түмэн ирж санал өгөхгүй байхад намынхаа 100 гишүүний саналыг тооцоод явах санаархал эрх баригчдад байна. сонгогчдын нэрсийн жагсаалтын намуудад өмнө нь өгдөг байсан. Тэгвэл Улсын бүртгэлийн тухай хуульд нэмэлт өөрчлөлт оруулан үүнийг хорьсон. Энэ ямар аюултай вэ гэвэл царцааны нүүдэл гээд сонгуулиар тухайн айл өөрөө мэдээгүй байхад дээр нь 30-40 хүн нэмж бүртгээд санал өгсөнд тооцоод явдаг байдал давтагдах нь. Ийм явдал болж байгааг сонгогчид мэдэж авах боломжийг хааж байна. Үүнээс үзэхэд 2020 оны сонгууль ямар байдлаар явах нь ойлгомжтой. Г.Ганбат /Эх орончдын нэгдсэн намын дарга/: - Ёс суртахуунгүй хүмүүсээс ёс суртахуунгүй хууль гардаг. УИХ-д олох болсон МАН сая Үндсэн хуульд ямар өөрчлөлт оруулсныг та бүхэн мэдэж байгаа. Ямар ч зөвшилцөлгүйгээр дур зоргоороо, хуйвалдаанаар Үндсэн хуулийг өөрчилсөн. Тиймээс манай намын хувьд Үндсэн хуулийн өөрчлөлт ард түмнийх хүсэн хүлээсэн сайн үр дүнд хүрэхгүй гэж үзэж байгаа. Бусад намууд ч үүнийг хэлж байгаа. УИХ дахь хоёр нам Үндсэн хуульд дарангуйлал тогтоосон. Тэр дарангуйлал улам муу зүг рүү авч явна. Сонгуулийн хуулийг тэд яг энэ арга технологиороо хийж байна. нийгмийн хүсэн хүлээж байгаа гуравдагч хүчин буюу парламентад суудалгүй намууд гуравхан хүсэлт тавьсан. Нэгдүгээрт, энэ хуулиараа хүний эрх ,эрх чөлөөг битгий дордуулаачээ. Хоёрдугаарт, хар машины тооллогыг зогсоо.Монгол Улсын аюулгүй байдал, тусгаар тогтнолыг та бүхэн чин үнэнээсээ хамгаалъя гэж боддог бол схем, толгой, удирдлага нь АНУ-д байдаг хар машинаар төрийн сонгууль явуулж болохгүй. Нийгмээ мэдэрч байгаа бол ард түмнээ, улс орныг зөв явуулах гуравдагч хүнийг хааж боодог явдлаа зогсоо. Гэтэл яаран сандран Сонгуулийн хуулиа хэлэлцэж батлахаар улайрч байна. Тэр нь гурван жил ярьсан Сонгуулийн хуулийн төсөл  гээд байгаа шүү дээ. Тэгээд яарч сандран яаж хийж байна вэ. Эрх ашгаа гүйцэлдүүлэх гэж энэ хоёр нам яаж чичирч, дэлхийд байхгүй зүйл хийж байгааг та бид нийтээрээ харлаа. Үүнийг эсэргүүцэх ёстой. Н.Энхбаяр гэдэг нэг хүний эсрэг хуулийн заалт оруулж байгаа харагдавч энэ нь цаанаа нийтийн эрх ашгийг, монгол хүний эрхийг зөрчиж даварч байна шүү дээ. Бид Н.Энхбаярыг өмөөрөөгүй, бүхэл бүтэн Үндсэн хуулийг зөрчиж, монголчуудын эвлэлдэн нэгдэх эрх, эрх чөлөөг зөрчиж байхад дуугүй сууж болохгүй. Бид эрхээ хамгаалах ёстой. Өнөөдөр Н.Энхбаярыг ингэж байна гээд чимээгүй хараад өнгөрвөл дараа нь ийм асуудал бидэнд тулгарна. Дарангуйлал үргэлжилнэ. УИХ хууль нулимаад хууль тогтоогоод байна. Эх сурвалж: www.polit.mn