Ч.ЗОТОЛ Эдийн засгийн байнгын хороо  өнөөдөр хөдөө аж ахуйн Хоршоо байгуулах тухай  Д.Элдэв-Очир гишүүний санаачилсан хуулийн төслийн шинэчилсэн найруулгыг  хэлэлцсэн юм. Манай улс 1995 онд анх Хоршооны тухай хуультай болсон. Үүнээс хойш нэг удаа шинэчилсэн найруулга, таван удаа нэмэлт, өөрчлөлт оруулжээ. Энэ удаа  улс орны нийгэм, эдийн засгийн  байдалтай уялдуулан шинэчлэн  найруулахаар  хэлэлцэж  байна. Байнгын хорооны гишүүд саналаа хэлж, асуулт асуухад С.Чинзориг гишүүн  “Хоршоо байгуулна гэдэг нь  иргэдийн өөрсдийнх нь үүсгэл санаачилгад тулгуурлах ёстой.  Гэтэл сүүлийн жилүүдэд энэ зарчим алдагдсан. Зөвхөн ноосны урамшуулал авахын тулд хоршооны гишүүн байх ёстой гэх  кампаничилсан ажил явагдсан. Цаашид  энэ хуульд заавал иргэдийг хоршооны гишүүн байх ёстой гэж бодлогоор шахдаг асуудал арилах уу” гэдгийг  төсөл санаачлагчаас асууж байсан юм.  Уг хуулийн төслөөр дээрх гажуудлыг арилгах, хоршооны гишүүн нэг бүрийн эрх ашгийг хангах, нэг сум-нэг хоршоо, нэг баг-нэг хоршоо гэсэн зарчмыг дэвшүүлж байгаа. Ингэснээр ченжүүдийн сүлжээ алга болно, хоршооны гишүүн нэг бүрт ашигтай байж чадна  гэж  төсөл санаачлагчид ярьж байна. Зарим гишүүн  хоршооллын асуудал зөвхөн салбарын  яаманд байх нь хэр зохимжтой вэ. Тэгсэн атлаа ЖДҮХС-гийн зээлээс хоцроод байдаг. Нэг эзэнтэй компани маягаар үйл ажиллагаа явуулдаг зөрчил их байдаг.  Цаашид хөдөлмөрлөлтийг дэмжих сангийн бодлоготой уялдуулан санхүүжилтийн дэмжлэг авах тал дээр бодлогоор уяж өгмөөр байна гэдэг саналыг хэлж байв. Эх сурвалж: www.polit.mn