С.САРУУЛ Эрх баригч намын бүлэг Үндсэн хуулийн өөрчлөлтөөр санал нэгдэж чадалгүй 14 хоносон. Тэгвэл өчигдөр 64 гишүүний 20 нь оролцсон бүлгийн хурлаар Үндсэн хуулийн зарим өөрчлөлтийг дэмжих чиглэл гарсан байна. Тодруулбал, бүлэг Ерөнхийлөгчөөс ирүүлсэн УИХ-ын гишүүдийн тоо 108 байх саналыг хэлэлцэж, 99 гишүүнтэй байх дээр тогтжээ. Түүнээс гадна сонгуулийн тогтолцоогоо холимог байхаар тогтож, 76 нь тойрог дээр 23 нь намын жагсаалтад байх саналыг хүлээн авч, парламентаа таван жилээр сонгох шийдвэр гаргасан байна. Энэ шийдвэрийн бүлгийн бусад гишүүд автоматаар дэмжих гэнэ. Харин АН-ын зөвлөл өнөөдөр /2019.08.23/ ээлжит бусаар хуралдаж Үндсэн хуульд нэмэлт, өөрчлөлт оруулах төслөлд хүргүүлсэн саналаа хэлэлцсэн байна. Ардчилсан намын зүгээс нийтдээ 18 санал өгсөн бөгөөд үүнээс найман саналыг ажлын хэсэг хүлээж авах боломжгүй гэдгээ илэрхийлжээ.  Энэ талаар АН-ын зөвлөлийн дарга Д.Эрдэнэбат “Сонгуулийн тогтолцоо, төрийн татвар, эдийн засаг, орон нутгийн эдийн засагтай холбоотой асуудлыг хүлээж авахгүй боломжгүй гэсэн тайлбар бид хүлээж авахгүй, дахин ажлын хэсгийн хуралдаанд оруулж, байр сууриа илэрхийлнэ. Бидэнд ирсэн албан бус мэдээллээр МАН-ын бүлэг УИХ-ын гишүүдийн тоог 99 болгохыг дэмжсэн гэсэн. Бид үүнийг дэмжихгүй. Одоогийн 76 гишүүн нийгмийн итгэл, хүлээлтийг дааж чадахгүй байхад Үндсэн хуулийн өөрчлөлтөд гишүүдийн тоог нэмэхийг дэмжихгүй. Бид анхнаасаа Ерөнхийлөгчийн өргөн барьсан саналуудыг дэмжиж байгаагаа илэрхийлсэн. Хэрэв гишүүдийн тоог нэмэх гэж байгаа бол Ерөнхийлөгчийн өргөн барьсан 108 гишүүн байх, 50 хувь нь жагсаалтаар, 50 хувь нь тойргоос байх нь зөв гэдгийг бид дэмжинэ. Энэ нь илүү хариуцлагатай байх боломжтой гэж харж байна. 99, 108 хоёрын хооронд нэг их зөрүү байхгүй учраас 54, 54 байх нь зөв гэж хэлээд байгаа юм” гэлээ. Эх сурвалж: www.polit.mn