С.САРУУЛ Засгийн газрын өнөөдрийн /2019.05.12/ “Эрүүл мэндийн ажилтны нийгмийн хамгаалал” үндэсний хөтөлбөрийг баталжээ. Хөтөлбөрт тусгагдсан зорилт, арга хэмжээг жил бүрийн батлагдсан төсөвтөө багтаан хэрэгжүүлэх, шаардлагатай нэмэлт санхүүжилтийг олон улсын байгууллага, хувийн хэвшлийн оролцоог нэмэгдүүлэх замаар шийдвэрлэж байхыг сайд Д.Сарангэрэл, аймаг, нийслэлийн Засаг дарга нарт үүрэг болголоо. Хөтөлбөрт : -  Ажлын орчин нөхцлийг сайжруулж, эрүүл мэндийг хамгаалах -  Ур чадварыг тасралтгүй хөгжүүлэх -  Бодит орлого, ажиллах урам зоригийг нэмэгдүүлэх -  Нийгмийн хамгааллын чиглэлээр нотолгоонд суурилсан шийдвэр гаргахыг дэмжиж, оролцогч талуудын хамтын ажиллагааг өргөжүүлэх гэсэн дөрвөн чиглэл, 46 үйл ажиллагааг тусгажээ. Хөтөлбөрийг 2019-2023 онд таван жилийн хугацаатай хэрэгжүүлэх юм. Манай улсад 52 мянга гаруй эрүүл мэндийн ажилтан байгаагийн 93 хувь нь эрүүл мэндийн салбарт ажилладаг. Нийт ажилтны 82 хувь нь эмэгтэйчүүд гэсэн судалгаа гарчээ. 2018 онд Эрүүл мэндийн хөгжлийн төвөөс хийсэн судалгаанд хамрагдсан хүмүүсийн 20 хувь нь орон сууц болон хувийн тохилог орон сууцанд, 59.2 хувь нь хашаа байшинд, 15.2 хувь нь гэрт, 5.4 хувь нь түрээсийн байранд амьдардаг гэж хариулсан байна. Мөн судалгаанд оролцогчдын 10.3 хувь нь орон сууцны зээлтэй бөгөөд 42 хувь нь түрээсийн орон сууцанд, 87.4 хувь нь орон сууцны ипотекийн зээлд хамрагдах хүсэлтээ илэрхийлжээ. Эрүүл мэндийн сайд Д.Сарангэрэл “Засгийн газрын хуралдаанаар дөнгөж сая "Эрүүл мэндийн ажилтны нийгмийн хамгаалал' үндэсний хөтөлбөр батлагдлаа. Ингэснээр салбарын ажилтны орон сууц, ажлын нөхцөл, сургалт, хөдөлмөрийн аюулгүй байдал зэрэг цогц асуудлыг шат дараалалтай шийдэх боломжтой болж байна” гэж байр сууриа илэрхийллээ.  Эх сурвалж: www.polit.mn