Ч.ЗОТОЛ Хэнтий аймаг дахь УИХ-ын 42 дугаар тойргийн нөхөн сонгууль ирэх зургадугаар сарын 30-нд болно. Нөхөн сонгуульд оролцох улс төрийн намууд  хуульд заасан хугацааны дагуу сонгуульд оролцохоо илэрхийлсэн албан  бичгийг  Сонгуулийн ерөнхий хороонд өнөөдөр хүлээлгэн  өгөх юм. МАХН-ын Бага чуулган, Гүйцэтгэх зөвлөлөөс  нөхөн сонгуульд оролцох шийдвэрийг гаргасан.  Намын шийдвэр бусад бичиг баримтыг тус намын дэд дарга  Ц.Оюунбаатар, Ерөнхий нарийн бичгийн дарга Б.Тулга нар  Сонгуулийн ерөнхий хороонд хүлээлгэн өглөө. МАХН нөхөн сонгуульд хэнийг нэр дэвшүүлэх талаар Ерөнхий нарийн бичгийн дарга  Б.Тулгаас тодруулахад  “2017 оны Ерөнхийлөгчийн сонгуульд МАХН-аас нэр дэвшсэн С.Ганбаатар Хэнтий аймагт ялалт байгуулж байсан. Энэ дүнг авч үзвэл С.Ганбаатар нэр дэвших боломжтой. Мөн Хэнтий аймгийн МАХН-ын дарга С.Ононбаяр гэж залуу бий. Бас нэр дэвших боломжтой. Хэнтий аймгийн Засаг даргаар ажиллаж байсан С.Жаргал манай намын Гүйцэтгэх товчооны гишүүнээр ажилладаг. Энэ хүн дэвших боломжтой. Хэнтий аймгийн Дадал сумын уугуул, МАХН-ын дарга Н.Энхбаяр нэр дэвших боломжтой. Хэнийг нь нэр дэвшүүлэх бол гэсэн хүлээлт бий. Бид гишүүдээсээ асууж, судалгаа явуулж байгаа. Ирэх тавдугаар сарын 24-28-нд нэр дэвшигчээ тодруулж зарлана” гэлээ. Сонгуулийн ерөнхий хороо ирэх тавдугаар сарын 5-ны дотор тухайн намуудын материалтай танилцаж бүртгэх эсэхээ шийдвэрлэх юм байна. Эх сурвалж: www.polit.mn