Б.НАМУУНТАМИР Монгол Улсын Засгийн газар, Японы Олон Улсын хамтын ажиллагааны хүрээнд  Боловсрол, соёл, шинжлэх ухаан, спортын  яамнаас “Инженер технологийн дээд боловсрол төсөл”-ийг 2014 оноос хэрэгжүүлж иржээ. Энэхүү төслийн хүрээнд япон улсад 3 жил суралцаж төгссөн эхний ээлжийн 25 төгсөгч эх орондоо ирсэн байна. Төсөл хэрэгжүүлэгчдийн зүгээс дээрх оюутнуудыг ажлын байранд зуучлах, сурсан мэдлэг чадвараа эх орныхоо бүтээн байгуулалтад ашиглах зорилгоор “1000 инженер-ажлын байр” өдөрлөгийг өнөөдөр /04.09/ зохион байгууллаа. 1000 Инженер төслийн зохицуулагч Д.Намсрай: Төсөл хэрэгжээд тав дахь жилдээ явж байна. Энэ төсөл инженер, технологийн мэргэжлийн 1000 хүнийг Япон улсад мэргэжил эзэмшүүлэх зорилготой төсөл юм. Өнөөдрийн ажлын байрны өдөрлөгт Монгол Улсын томоохонд тооцогдох 27 компани оролцож байна. Тухайлбал Mobicom, ICT,АПУ ХХК, Говь ХК зэрэг компаниуд ажиллах санал ирүүлэн гэрээ байгуулсан. Гадаадад мэргэжил эзэмшсэн хүмүүс эх орондоо буцаж ирдэггүй, аулын байр хомс байдаг гэж яриад байдаг.  Харин ч эсрэгээрээ сурсан мэдсэнээ эх орныхоо бүтээн байгуулалт, хөгжил дэвшилд зориулан, ажлын байрны нөөц боломж хангалттай байдаг шүү гэдгийг харуулах үүднээс энэхүү өдөрлөгийг зохион байгуулж байна гэж хэллээ. Төсөлд хамрагдсан оюутнууд ШУТИС-ийн Коосэн бэлтгэл хөтөлбөрт 1,5 жил суралцаад шалгалтад тэнцсэн тохиолдолд Япон Улсын Коосэнд 3 жил суралцаж техник технологийн коллежийн дипломтой төгсөх юм байна. Мөн төгсөж ирээд ШУТИС-д 1 жил суралцан бакалаврын дипломтой болох боломжтой юм байна. Эх сурвалж: www.polit.mn