Ч.ЗОТОЛ УИХ-ын гишүүн Т.Аюурсайхан, Ж.Батзандан, Л.Болд, Х.Нямбаатар нар цаг үеийн асуудлаар мэдээлэл хийлээ. Энэ үеэр Т.Аюурсайхан гишүүн “МАНАН бүлэглэл улс төрийн намуудад төлөөллөө бат бэх суулгасан байна. Хууль, шүүхийн байгууллагад хүртэл төлөөллөө удирдлагын түвшинд тавьдаг. Үүнээс болж томоохон хэргүүд шийдвэрлэгдэггүй. Тиймээс бид энэ хаврын чуулганаар хууль, шүүхийн байгууллагын шинэчлэлийг дэвшүүлэн тавьж байна. Улсын ерөнхий прокурорыг хэдхэн хоногийн өмнө томилсон. Улсын ерөнхий прокурорын орлогчийг зөвшилцөхөөр санал хүргүүлээд байна. Өөрчлөлт шинэчлэлийг хийхдээ УИХ-аар томилогддог бүх албан тушаалтныг Нийтийн сонсголоор хэлэлцүүлж шийдвэрлэдэг байя гэж бид шийдсэн. АТГ-ын даргыг томилоход томилгооны асуудлаар сонсгол хийх саналтай байна. Иймд 19 гишүүн гарын үсэг цуглуулан АТГ-ын даргыг томилохдоо Томилгооны сонсгол хийхээр албан бичгээ өргөн барих гэж байна. Түүнчлэн Дээд шүүхийн ерөнхий шүүгч, Улсын ерөнхий прокурорын орлогч нарыг томилоход нээлттэй сонсгол явуулах саналыг хүргүүлж байна. Сонсгол явуулахгүй бол МАНАН бүлэглэл өөрсдийн хүнээ томилох магадлал өндөр байна” гэлээ. Эх сурвалж www.polit.mn